ბოლო დროს საქართველოს მისამართით აშშ-დან მიღებული კრიტიკული წერილები ვაშინგტონის მიერ ჩვენი ქვეყნისადმი და მისი მთავრობისადმი ნდობითა და ინტერესით არის განპირობებული, – ამის შესახებ „შაბათის ქრონიკაში“ პარლამენტის თავმჯდომარე არჩილ თალაკვაძემ განაცხადა. მისი თქმით, არავინ მისწერს წერილს ადამიანს, თუ არ აქვს იმის მოლოდინი, რომ მას საკითხების გადაჭრა შეუძლია.
„ჩვენი ამერიკელი კოლეგების კითხვები, წერილები თუ წინადადებები მიუთითებს ერთადერთზე: რომ მათ აქვთ ინტერესი, ოპტიმიზმი და ნდობა საქართველოს და მისი ხელისუფლების მიმართ. მითხარით, წერილს რატომ მისწერდით ვინმეს, თუ არ გაქვთ მოლოდინი, რომ ის არის თქვენი პარტნიორი და მას თქვენი ესმის“? – განაცხადა თალაკვაძემ.
მისი თქმით, კონგრესსა და პარლამენტს შორის კომუნიკაციაში წყვეტა განპირობებული იყო იმით, რომ საგარეო პოლიტიკაზე პასუხისმგებელმა დეპუტატებმა უმრავლესობა დატოვეს.
„დღეს, შემიძლია გითხრათ, რომ ეს არხები არის აღდგენილი და ჩვენ გვაქვს სრულფასოვანი კომუნიკაცია. არა მხოლოდ მაშინ, როდესაც ჩვენ ვიყავით ჩასულები, არამედ ჩვენ გვაქვს უკვე მუდმივი კომუნიკაცია ჩვენ პარტნიორებთან. როგორც საელჩოს და ელჩების საშუალებით, ასევე როგორც პოლიტიკოსებს პოლიტიკოსებთან“, – განმარტა თალაკვაძემ.
ბოლო პერიოდის განმავლობაში საქართველოს ხელისუფლებას ამერიკელ კონგრესმენთა და სენატორთა ნაწილმა კრიტიკული წერილები გამოუგზავნა.