აჭარაში კორონავირუსის შიდა გავრცელების პირველი შემთხვევა დაფიქსირდა, – ამის შესახებ აჭარის ჯანდაცვის მინისტრის მოადგილე ნინო ნიჟარაძემ ჟურნალისტებს განუცხადა. მისი თქმით, ინფიცირებული 60 წლის ქალია, რომელმაც ბათუმის ერთ-ერთ კლინიკას თავდაპირველად მუცლის ტკივილის ჩივილით მიმართა.
ნინო ნიჟარაძის თქმით, კონტაქტების ნაწილი გარკვეულია და ისინი თვითიზოლაციაში ან კარანტინში იმყოფებიან.
“60 წლის ქალს კორონავირუსი დაუდასტურდა, ყველა ახლო კონტაქტის მოძიება მიმდინარეობს, ქალბატონი ბათუმში ცხოვრობს. მან გასული დღეების განმავლობაში ორ სხვადასხვა სამედიცინო დაწესებულებას მიმართა. რაც შეეხება სამედიცინო პერსონალს – ჩვენს ქვეყანაში შექმნილი ვითარებიდან გამომდინარე, ყველა სამედიცინო სფეროს წარმომადგენელს მოვუწოდებთ, სრულად იყვნენ ეკიპირებულნი. 5 მათგანი, რომელთაც სრული ეკიპირება არ ჰქონდა, გადაყვანილია კარანტინში, 2 კი თვითიზოლაციაში იმყოფება“, – განაცხადა ნინო ნიჟარაძემ.
ბათუმის ცხელების ცენტრში ამ ეტაპზე კორონავირუსით ინფიცირებულ 10 პაციენტს მკურნალობენ. 7 პირის ლაბორატორიული კვლევის შდეგი კი დღეს საღამოს გახდება ცნობილი.
შეგახსენებთ, რომ, ბოლო მონაცემებით, საქართველოში კორონავირუსის 195 დადასტურებული შემთხვევაა, მათგან 39 უკვე გამოჯანმრთელდა, 2 – გარდაიცვალა. ამ დროისთვის, ქვეყნის მასშტაბით, კარანტინის რეჟიმში 4078 ადამიანი იმყოფება, სტაციონარში მეთვალყურეობის ქვეშ კი 370 პირია.