მეხანძრე-მაშველებს, პოლონური საგრანტო პროგრამის ფარგლებში, სამთო-სამაშველო კურსი ჩაუტარდათ

შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველებს, პოლონური საგრანტო პროგრამის ფარგლებში, სამთო-სამაშველო კურსი ჩაუტარდათ.
პოლონელმა ინსტრუქტორებმა თეორიული და პრაქტიკული სამთო-სამაშველო სწავლება 28 მეხანძრე-მაშველს საქართველოს სამ რეგიონში: სვანეთში, ბორჯომისა და ყაზბეგის მუნიციპალიტეტებში ჩაუტარეს.
კურსის განმავლობაში საგანგებო სიტუაციების მართვის სამსახურის თანამშრომლები მაღალ მთაში, რთულ რელიეფზე სამაშველო ოპერაციების განხორციელების საკითხებში გადამზადდნენ. სწავლების დასრულების შემდეგ, პოლონურმა მხარემ ქართველ მეხანძრე-მაშველებს სპეციალური სამთო აღჭურვილობა გადასცა.
სასწავლო კურსი ორგანიზაცია „ICAD”-ის მიერ, პოლონური საგრანტო პროგრამის ფარგლებში განხორციელდა. პროექტი სამწლიანია და მიზნად ისახავს საქართველოს მთიან რეგიონებში მუშაობისთვის სამთო-სამაშველო შესაძლებლობების განვითარებას.