“ავრცელებენ სრულიად ანტიქართულ, ჩვენი ქვეყნისთვის დამაზიანებელ განცხადებებს, რომელიც არ შეესაბამება სინამდვილეს,” – ამის შესახებ საქართველოს პარლამენტის თავმჯდომარის მოადგილემ გიორგი კახიანმა საფრანგეთის ეროვნული ასამბლეის შენობაში საქართველოს შესახებ გამართულ დისკუსიაზე ეკა გიგაურის გამოსვლასთან დაკავშირებით განაცხადა.
„ასეთი ფორმით ცდილობენ თავიანთი პატრონების მხრიდან გარკვეული მხარდაჭერის მოპოვებას. ასეთ გამოსვლებს მოაყოლებენ იმას, რომ იქნება საქართველო დასანქცირდეს, უვიზო რეჟიმი გაუქმდეს და ა.შ.“, – აღნიშნა კახიანმა.
შეგახსენებთ, საფრანგეთის ეროვნული ასამბლეის შენობაში საქართველოს შესახებ გამართულ დისკუსიაზე „საერთაშორისო გამჭვირვალობა-საქართველოს“ აღმასრულებელი დირექტორი ეკა გიგაური სიტყვით გამოვიდა. მან სახელმწიფოს „რუსული მეთოდებით მართვაზე“ ისაუბრა და პარტნიორებს მოუწოდა, „ნუ დატოვებენ საქართველოს მოქალაქეებს მარტო”.