ისრაელის პრემიერ-მინისტრი ბენიამინ ნეთანიაჰუ გაეროს გენერალური ასამბლეის წინაშე სიტყვით გამოვიდა.
გამოსვლისას ნეთანიაჰუმ ისრაელი გენოციდის ბრალდებებისგან დაიცვა, მხარდაჭერისთვის აშშ-ის პრეზიდენტ დონალდ ტრამპს მადლობა გადაუხადა და ირანი და კატარი ისრაელის საწინააღმდეგო პროპაგანდის დაფინანსების გამო გააკრიტიკა.
თუმცა, ყველაზე მწვავე განცხადებები ნეთანიაჰუმ თურქეთის პრეზიდენტ რეჯეფ თაიფ ერდოღანის მისამართით გააკეთა და მას „ტირანი“ და „ანტისემიტური სიცრუის მთავარი გამავრცელებელი“ უწოდა.
„ერდოღანი ტირანია. ის თურქეთში „ჰამასს“ მასპინძლობს. მან ათასობით ქურთი მშვიდობიანი მოქალაქე მოკლა. ის უარყოფს სომხების გენოციდს. ის ციხეში სვამს ჟურნალისტებსა და ოპოზიციის ლიდერებს. ის უკანონოდ ახორციელებს ჩრდილოეთ კვიპროსის ოკუპაციას და რეგულარულად არღვევს საბერძნეთის უფლებებს. ახლა კი მას სირიის ხელში ჩაგდება სურს“, – განაცხადა ნეთანიაჰუმ.