ჩვენ შეხვედრა გავმართეთ სენატის საგარეო და თავდაცვის კომიტეტის თავმჯდომარესთან. ასევე შეხვედრა გვქონდა ეროვნულ ასამბლეაში ევროპულ საქმეთა კომიტეტის თავმჯდომარესთან და მის წევრებთან. რა თქმა უნდა, აქაც მთავარი საკითხი იყო საქართველოს ევროკავშირში გაწევრიანება, – ამის შესახებ საგარეო ურთიერთობათა კომიტეტის თავმჯდომარემ, ნიკოლოზ სამხარაძემ საფრანგეთში ვიზიტის შეჯამებისას განაცხადა.
„ფრანგი პოლიტიკოსებისგან ძალიან სასიამოვნოა იმის მოსმენა, რომ საქართველოს ადგილი ევროკავშირშია და ისინი საქართველოს ევროკავშირის მომავალ წევრად მოიაზრებენ. ეს არის საფრანგეთის მხრიდან ძალიან დიდი ცვლილება საფრანგეთის საგარეო პოლიტიკაში და ასევე ფრანგების მხრიდან ევროკავშირის აღქმაში და გაფართოების პოლიტიკაში. ყველა შეხვედრაზე დაგვიდასტურეს ურყევი მხარდაჭერა. მათ ინფორმაცია მივაწოდეთ იმ პროგრესზე, რაც გვაქვს ასოცირების შეთანხმებასა და რეკომენდაციებთან დაკავშირებით. იმ საფრთხეებზე ვისაუბრეთ, რომელიც საქართველოს აქვს – უსაფრთხოების გამოწვევები, ოკუპაცია, რუსეთის უკრაინაში აგრესიიდან გამოწვეული საფრთხეები. ძალიან სასიამოვნოა, რომ ფრანგი პოლიტიკოსების მხრიდან ძალიან ადეკვატურად ხდება ამ საკითხების აღქმა და სრული გაგებაა იმ პოლიტიკის, რასაც ქვეყანა აწარმოებს, რომ მთავარია შევინარჩუნოთ მშვიდობა და სტაბილურობა“, – განაცხადა ნიკოლოზ სამხარაძემ.