თუ ეს ქვეყანა დარჩება ევროპულ გზაზე, მე დავბრუნდები თავდაცვის სამინისტროში. ამის გარანტია შემიძლია მოგცეთ, – ამის შესახებ თავდაცვის მინისტრმა თინა ხიდაშელმა ”იმედის დროში” განაცხადა.
მისი თქმით, ის ყოველთვის ამბობდა და დღესაც იგივე აზრზეა, რომ თავდაცვის სამინისტროში არის ძალიან ბევრი საქმე გასაკეთებელი.
”სხვათა შორის ძალიან საინტერესო განცხადება გააკეთა ნატო-ს გენმდივანმა იენს სტოლტენბერგმა, რომ დღეიდან ბრიუსელი იწყებს მუშაობას 2 წლის შემდეგი სამიტის მოსამზადებლად. მეც ზუსტად იგივე პოზიცია მაქვს. დღეიდან, ხვალ დილიდან ჩვენ უკვე ახალი საათი უნდა ჩავრთოთ 2 წლის შემდეგი სამიტის მოსამზადებლად. ჩემი სურვილი მნიშვნელოვანი არ არის, მე მზად ვარ ვემსახურო ჩემს ქვეყანას, იქ, სადაც ჩემი აზრით, ყველაზე უკეთესად გამომდის, სადაც ძალიან ბევრი კარგი საქმე გავაკეთე და წინ ბევრი კარგად გასაკეთებელი საქმეა”, – განაცხადა ხიდაშელმა.
მისივე თქმით, მთავრობას ჰყავს ხელმძღვანელი და მისი გადასაწყვეტია იქნება თუ არა ის პოსტზე.
”მე შემიძლია დავრჩე მინისტრად, მე შემიძლია დღესვე წავიდე მინისტრობიდან, წავიდე 2 თვის შემდეგ, ამას ჩემთვის მნიშვნელობა არ აქვს. ჩემთვის ყველაზე მნიშვნელოვანია რა მოხდება 8 ოქტომბრის შემდეგ, რა ტიპის არჩევანს გააკეთებს საზოგადოება და რა ადგილს მიუჩენს პრორუსულ ძალებს და რა დოზით დატოვებს დასავლეთელ ძალებს ხელისუფლებაში.
თუ ეს ქვეყანა დარჩება ევროპულ გზაზე, მე დავბრუნდები თავდაცვის სამინისტროში. ამის გარანტია შემიძლია მოგცეთ, მაგრამ მე არ ვიცი რა არჩევანს გააკეთებს ჩვენი მოსახლეობა. ამიტომ, 8 ოქტომბერი არის მნიშვნელოვანი და არა აქედან 8 ოქტომბრამდე ვინ იქნება თავდაცვის მინისტრი”, – განაცხადა ხიდაშელმა.