თბილისში, ღამის ეკონომიკის პროექტის ფარგლებში პარასკევსა და შაბათს ღამის საათებში ავტობუსების დამატებითი რეისები დაინიშნება, – ამის შესახებ დედაქალაქის მერმა კახა კალაძემ განაცხადა.
როგორც კახა კალაძემ აღნიშნა, პროექტის განხორციელება სექტემბრის შუა რიცხვებიდან დაიწყება.
ამასთან, კალაძის განცხადებით, თბილისში ოქტომბერში ღამის ეკონომიკის საკითხებზე საერთაშორისო ფორუმი გაიმართება.
“ოქტომბერში ვგეგმავთ საქართველოში ძალიან დიდი ფორუმის ჩატარებას, რომელიც საერთაშორისო მნიშვნელობის იქნება. მასზე მოწვეული იქნებიან სხვადასხვა ქვეყნებიდან „ღამის მერები“. ჩვენ ვიმსჯელებთ იმაზე, თუ რა გაკეთდა სხვადასხვა ქვეყანაში ამ მიმართულებით, როგორი იყო მუნიციპალიტეტის ჩართულობა, რა პროექტებში მიიღეს მონაწილეობა და ა.შ. პირველი პროექტი, მაგალითად, ავტობუსების დამატება, რომელიც ძალიან მნიშვნელოვანია ღამის საათებში, განსაკუთრებით, პარასკევი-შაბათი, ამას ვაკეთებთ და სექტემბერის შუა რიცხვებიდან ეს პროექტი ჩაეშვება. სხვა მნიშვნელოვან პროექტებზეც მიმდინარეობს მუშაობა და დროდადრო მოგაწვდით ინფორმაციას”, – განაცხადა კახა კალაძემ.