ზუგდიდში ევროკავშირის სადამკვირვებლო მისიის თანამშრომლის პირადი ავტომობილიდან ქურთუკი და აკუმულატორი ამოიღეს. ინფორმაცია ამის თაობაზე “რუსთავი 2”-მა გაავრცელა.
“კურიერის” ცნობით, ბოლო ერთი თვის მონაცემებით ზუგდიდში ევროკავშირის მანქანა მეორედ გაქურდეს და რეგიონში კრიმინალურმა ფაქტებმა იმატა.
შსს-ს ინფორმაციით, მომხდარ ფაქტზე გამოძიება სსკი-ის 177-ე, ქურდობის მუხლით მიმდინარეობს. შემთხვევის ადგილზე ექსპერტ-კრიმინალისტები მუშაობენ.
შეგახსენებთ, სულ ცოტა ხნის წინ, შსს-ს მიერ გამოქვეყნებული სტატისტიკის მიხედვით, სამეგრელოში დანაშაულის გახსნის ყველაზე მაღალი მაჩვენებელია და დანაშაულის ყველაზე ნაკლები ფაქტი ფიქსირდება.
აშკარაა, რომ “კურიერის” “სამიზნე” ამჯერად სამეგრელო გახდა. შეგახსენებთ, ტელეკომპანია “რუსთავი 2”-მა ორი დღის წინ გაავრცელა ინფორმაცია იმის თაობაზე, რომ იმერეთში და იორმუღანლოში კრიმინალური ფაქტები გახშირდა.
როგორც შსს-ს პრეს-სამსახურში განაცხადეს იორმუღანლოში ქურდობის არცერთი ფაქტი არ დაფიქსირებულა. რაც შეეხება იმერეთში არსებულ მდგომარეობას, იმერეთის პოლიცია ქურდობის 2 ფაქტს და ქურდობის მცდელობის ერთ ფაქტს იძიებს და რეგიონში ბოლო კვირაში ქურდობის 40 ფაქტი არ დაფიქსირებულა.