ბაკურიანში უმცროსმა ძმამ უფროსი ძმა მოკლა. შემთხვევა 6 მარტს, მათივე საცხოვრებელ სახლში, დაახლოებით 19:00 საათზე მოხდა. შემთხვევას თვითმხილველი არ ჰყავს, თუმცა 20 წლის ი.ბ.-მ დაკავებისას დანაშაული აღიარა.
ბრალდებულისა და გარდაცვლილის დედა ამბობს, რომ არც ერთი შვილი ალკოჰოლის ზემოქმედების ქვეშ არ იმყოფებოდა.
ძმებს ჩხუბი არასდროს მოსვლიათ. სამსახურში ვიყავი, მეზობლებმა დამირეკეს, ეზოში შენი უფროსი ბიჭია დაჭრილიო. რომ მოვედი პატარა თოვლში იყო ჩაცუცქული და ტიროდა, დიდი ძირს უსულგულოდ ეგდო, ეს რა ვნახე, სულ დაჩეხილი იყო. არ ვიცი რა მოხდა“, – ამბობს ქეთინო ბასილაშვილი.
„ახლობელმა დამირეკა ძმამ ძმა მოკლა და მიდიო. რომ მოვედი გამომძიებლები მუშაობდნენ. სისხლიანი ქურთუკი და დანა ამოიღეს. ეზოდან სისხლის სამი ნიმუში აიღეს. ყველა იმას ამბობს, ძალიან კარგი, პატიოსანი ბიჭია დაკავებულიო. გაოგნებულები არიან მეზობლები“, – ამბობს ბაკურიანის მკვიდრი ტრისტან მეხრიშვილი.
მეზობლები ამბობენ, რომ ძმებს შორის კონფლიქტს არასდროს შესწრებიან.
„ორივე ძმა მუშაობდა. 25-იანებში დამსვენებლებს თხილამურებზე სრიალს ასწავლიდნენ. წყნარი და ზრდილობიანი ბიჭები არიან“, – გვიყვება გარდაცვლილისა და დაკავებული ძმების მეზობელმა დავით აჩოიანმა.
შსს-მ გამოძიება დამამძიმებელ გარემოებაში ჩადენილი განზრახ მკვლელობის მუხლით დაიწყო. დანაშაული 13-იდან 17 წლამდე ვადით თავისუფლების აღკვეთას ითვალისწინებს.