ყველა კოლეგას, განსაკუთრებით „ქართული ოცნების“ წარმომადგენლებს მინდა გთხოვოთ, რომ არ გაიზიაროთ პროკურატურის შუამდგომლობა, – ამის შესახებ „მოქალაქეების“ წევრმა, ალეკო ელისაშვილმა პარლამენტის პლენარულ სხდომაზე სიტყვით გამოსვლისას ნიკა მელიაზე საუბრისას განაცხადა.
„ჩვენ თუ გვინდა ნორმალურ ქვეყანაში ვიცხოვროთ, ნორმალურ ქვეყანაში ოპოზიციის პარტიის არც წარმომადგენელებს და მით უფრო, თავმჯდომარეებს იმუნიტეტს არ უნდა უხსნიდნენ. იმუნიტეტის არსი, შინაარსი არის და ამიტომ მოიგონეს სადეპუტატო იმუნიტეტი, რომ ოპოზიციურ დეპუტატებს ჰქონდეთ გამოხატვის თავისუფლებისას ხელები გახსნილი, არ ეშინოდეთ თავისი ქმედებების.
ვიღაცამ შეიძლება მითხრას, რომ რას ექომაგები იმ კაცს, რომელიც დილიდან შენზე საძაგლობებს იძახისო, ფაქტია რომ ნიკა მელია ჩემთან მიმართებაში ზღვარს გასცდა, აშკარად სიტყვა გაექცა და ზედმეტები მოსდის, თუმცა მძიმე ემოციური ფონი აქვს და ამით გავამართლებ მის ქმედებას.
თუ გინდათ ნორმალური ქვეყანა, როგორი დამოკიდებულებაც არ უნდა გქონოდეთ მელიასა და „ნაციონალური მოძრაობისადმი“, არ დაუჭიროთ მხარი მისთვის უფლებამოსილების შეწყვეტის საკითხს“, – განაცხადა ალეკო ელისაშვილმა.