არ წავალ შეთქმულების თეორიებში, რომ „ნაცმოძრაობას“ წინასწარ ჰქონდა შეთანხმებული ე.წ. მესიჯბოქსი, უბრალოდ მათ ძალიან კარგად იცოდნენ, რას იტყოდა გავრილოვი. იგივე იქნებოდა, რომ დაერეკათ, მაგალითად, ჟირინოვსკისთან. ამიტომაც მათ სცადეს, გადაეფარათ თავიანთი პოლიტიკური მარცხი, – ამის შესახებ ტელეკომპანია „იმედის“ გადაცემაში „დღის ქრონიკა“ რეგიონული პოლიტიკისა და თვითმმართველობის კომიტეტის თავმჯდომარემ, „ქართული ოცნების“ პოლიტსაბჭოს წევრმა, სოზარ სუბარმა განაცხადა.
„სხვათა შორის, დღეს წავიკითხე, რომ გავრილოვი ამ ინფორმაციას ტყუილს უწოდებს, თუმცა ამას აღარ აქვს მნიშვნელობა, უბრალოდ ეს ადამიანები ერთმანეთს აძლიერებენ ყოველ ჯერზე. 2004 წელს მაშინდელმა ხელისუფლებამ გააჩერა 400-მდე ჩვენი მოქალაქე და 5 დღე ჰყავდათ სოფელ კეხვთან, ავტობუსებში. „ნაცმოძრაობა“ აიძულებდა საქართველოს მოქალაქეებს, დაეტოვებინათ ჩვენი ქვეყნის ტერიტორია და წასულიყვნენ რუსეთში. ამ ხალხის ნაწილს რუსეთში ჟირინოვსკის პარტია იჭერდა, სვამდა ავტობუსებში და დეპორტაციას უკეთებდა რუსეთიდან, ხოლო საქართველო მათ უკან რუსეთში აძევებდა. როდესაც მე, როგორც სახალხო დამცველი, ამ ადამიანებს ვიცავდი, „ნაცმოძრაობის“ არხები ამბოდნენ, რომ მე ჟირინოვსკის სცენარით ვმოქმედებდი“, – განაცხადა სუბარმა.
„სიცრუე, რომელიც იღვრება 20 ივნისის მოვლენების ინტერპრეტირებისას, იღვრება ნიკა მელიას მიერ, ადასტურებს, რომ სიცრუის ხარჯზეც ცდილობენ შელახონ საქართველოს იმიჯი მისი მეზობლების თვალში“, – ეს განცხადება დუმის დეპუტატმა სერგეი გავრილოვმა „ტვ პირველის“ ეთერში გააკეთა.
სერგეი გავრილოვის განცხადებას ნიკა მელიამ სპეციალური ბრიფინგით უპასუხა. „ნაციონალური მოძრაობის“ თავმჯდომარე აცხადებს, რომ ესაა მკაფიო ხაზი, რომლის ერთ მხარესაც გავრილოვია, მეორე მხარეს კი ქართველი ხალხი.