ჰუბერტ ქნირშს კატეგორიულად არ ვეთანხმები, – ასე ეხმაურება „ერთიანი საქართველოს“ ლიდერი ნინო ბურჯანაძე საქართველოში გერმანიის ელჩის ჰუბერტ ქნირშის განცხადებას, სადაც ელჩმა აღნიშნა, რომ საქართველოში აშკარაა საფრთხე, პარტიებმა თავი პირველ ადგილზე დააყენონ, ეს ნათელია, როდესაც კენჭს იყრიან პარლამენტში, მაგრამ არ იღებენ პასუხისმგებლობის ტვირთს.
„ძალიან ვწუხვარ ბატონი ქნირშის ამ განცხადების გამო, მას კატეგორიულად არ ვეთანხმები და კარგი იქნებოდა, რომ მოეწოდებინა ხელისუფლებისათვის, რომელმაც საკუთარი თავი დააყენა ქვეყანაზე მაღლა და ბიძინა ივანიშვილმა შექმნა ვითარება ლუდოვიკო მეთოთხმეტესავით – სახელმწიფო ეს მე ვარ. ძალიან მიკვირს თუ ამას ბატონი ქნირში ვერ ხედავს, ეს ძალიან სამწუხაროა. ხოლო თუ ხედავს და არ ამბობს, არამედ მხოლოდ ოპოზიციური პარტიებისკენ იშვერს ხელს, ეს კიდევ სრულიად გაუგებარია. არც ერთ ოპოზიციურ პარტიას თავისი პარტიული ინტერესი არ დაუყენებია მაღლა და თითოეული ჩვენგანი გარკვეულწილად დავზარალდით კიდეც იმ ერთობით, ყოველ შემთხვევაში რაღაც ეტაპზე და შეიძლება ნაწილობრივ ახლაც ნარჩუნდება ეს დაზარალება. მაგრამ რას ვითხოვთ ძალიან მაინტერესებს, ვადამდელ, თავისუფალ და დემოკრატიულ არჩევნებს“, – განაცხადა ნინო ბურჯანაძემ.
მისივე თქმით, ბრძოლას ყოველთვის აქვს აზრი და მიაღწევენ, რომ ქვეყანაში ვადამდელი არჩევნები ჩატარდეს.
„იქნება, ამაში ვარ დარწმუნებული, ბრძოლას ყოველთვის აქვს აზრი. ეს ძალიან კარგად ვიცი და იცი რა, ბატონ ქნირშს და მის კოლეგებს თავის დროზე რომ მოეწოდებინათ და კატეგორიულად ეთქვათ, რომ გაყალბება ხელისუფლებას არ შერჩებოდა, შესაძლოა, საქმე აქამდე არ მისულიყო“, – აღნიშნა ნინო ბურჯანაძემ.
საქართველოში გერმანიის ელჩმა, ჰუბერტ ქნირშმა განაცხადა, რომ საქართველოში აშკარაა საფრთხე, რომ პარტიებმა თავი პირველ ადგილზე დააყენონ, ეს ნათელია, როდესაც კენჭს იყრიან პარლამენტში, მაგრამ არ იღებენ პასუხისმგებლობის ტვირთს.