თბილისის მერის, „ქართული ოცნების“ გენერალური მდივნის, კახა კალაძის განცხადებით, პარტია მიიღებს გადაწყვეტილებას იმასთან დაკავშირებით, თუ ვინ იქნება წარმოდგენილი მოლაპარაკებების მაგიდასთან პრემიერ-მინისტრ ირაკლი ღარიბაშვილთან ერთად.
„მოლაპარაკებებს ალტერნატივა არ აქვს. გუნდის მხრიდან მიღებული იქნება გადაწყვეტილება, თუ ვინ იქნება წარმოდგენილი მოლაპარაკებების მაგიდასთან პრემიერ-მინისტრთან ერთად. თუ ჩვენ ვფიქრობთ ქვეყნის მომავალზე, განვითარებაზე, სტაბილურობაზე, პანდემიის შედეგების დაძლევაზე, ამისთვის მნიშვნელოვანია სიმშვიდე. ამიტომ კომპრომისებსა და დიალოგს ალტერნატივა არ აქვს“, – განაცხადა კახა კალაძემ.
საქართველოში ვიზიტის ფარგლებში, ევროპული საბჭოს პრეზიდენტი შარლ მიშელი ხელისუფლებისა და ოპოზიციის წარმომადგენლებს შეხვდა და მხარეებს შეთანხმებისკენ მოუწოდა. ოპოზიციისთვის მთავარ მოთხოვნებად რიგგარეშე არჩევნების დანიშვნა და ნიკა მელიას და გიორგი რურუას გათავისუფლება რჩება, „ქართული ოცნება“ კი ამბობს, რომ დესტრუქციული ნაბიჯებით მოლაპარაკებების პროცესს თავად ოპოზიცია აფერხებს.