დაავადებათა კონტროლის ეროვნული ცენტრის ხელმძღვანელმა ამირან გამყრელიძემ საზოგადოებას ბოდიში მოუხადა AstraZeneca-ის ვაქცინის მიწოდების შეფერხებასთან დაკავშირებით. როგორც მან აღნიშნა, ყველას, ვინც დარეგისტრირებული იყო რევაქცინაციაზე, მეორე დოზის გარეშე არ დარჩებიან.
ამირან გამყრელიძემ საკოორდინაციო საბჭოს დასრულების შემდეგ ისაუბრა, თუ რატომ შეიქმნა დეფიციტი ქვეყანაში. მისი თქმით, AstraZeneca-ის ვაქცინა ქვეყანას შესყიდული აქვს Covax-ის პლატფორმით, რაც უნდა შემოსულიყო ბოლო მონაცემებით, 22 ივნისის გამთენიისას. თუმცა, მისი თქმით, მოწოდებაში არის სერიოზული შეფერხება.
„მოგეხსენაბათ, რომ AstraZeneca-ს ვაქცინა ქვეყანაში შემოვიდა ორჯერ, 86 600-მდე დოზა ჯამში. პირველი შემოსვლა იყო მარტის 13-ში, მეორე შემოსვლა იყოს აპრილის შუა რიცხვებში. მესამე შემოსვლა უნდა ყოფილიყო (ეს იყო Covax-ით შესყიდული ვაქცინა) მაისის შუა რიცხვებში. შემდგომ მოწოდების ეს ვადა გადავიდა ივნისზე, ჯერ საუბარი იყო ივნისის დასაწყისზე, შემდეგ კი გვითხრეს, რომ მოგვეწოდებოდა ივნისის 22-ში გამთენიისას. სამწუხაროდ მოხდა ისე, რომ მოწოდებაში არის სერიოზული შეფერხება, რომელიც არის დაკავშირებული ბევრ ფაქტორებთან, რომელსაც მე ახლა არ ჩავუღრმავდები, მაგრამ, ფაქტია, რომ ეს მოწოდება ვერ მოხდა. ამიტომ ჩვენ შეგვექმნა 4000-5000-მდე ვაქცინის დეფიციტი AstraZeneca-ზე“, – განაცხადა მან.
როგორც ამირან გამყრელიძე აცხადებს, დეფიციტი ძირითადად შეიქმნა სამ კლინიკაში და ესენი არის რესპუბლიკური საავადმყოფო, ინფექციური საავადმყოფო და ხეჩინაშვილის კლინიკა. როგორც გამყრელიძემ განმარტა, იყო გარკვეული ლოჯისტიკური პრობლემებიც.
„დეფიციტი ძირითადად იყო რესპუბლიკურ საავადმყოფოში, ინფექციურ საავადმყოფოში და ასევე ე.წ. ხეჩინაშვილის სახელობის კლინიკაში. რატომ, იმიტომ რომ მოგეხსენაბთ ყველაზე მეტ აცრებს ეს 2 წამყვანი კლინიკა ატარებს, მხედველობაში მაქვს ცენტრალური რესპუბლიკური საავადმყოფო და ხეჩინაშვილის კლინიკა. ამ საკითხთან მიმართებით მოკვლევა მიმდინარეობს. იყო, არ დავმალავ გარკვეული ლოჯისტიკური პრობლემები, ამ პასუხისმგებლობას იზიარებს დაავადებათა კონტროლის ცენტრიც. მაგრამ ეს არ არის ის, რომ ადამიანთა ჯანმრთელობას მიადგეს ზიანი“, – თქვა მან.
დაავადებათა კონტროლის ეროვნული ცენტრის ხელმძღვანელის განცხადებით, AstraZeneca-ის ვაქცინის 1600-მდე დოზა გადანახულია და იმ ადამიანებს, რომლებსაც უწევთ მე-10-მე-12 კვირა პირველი ვაქცინაციიდან, აცრას შეძლებენ.
„ვინც ჩაწერილია და მათ 10-დან 12 კვირის განმავლობაში აქვთ აცრა ჩასატარებელი, ყველა ის ადამიანი აიცრება. 1 600-მდე დოზა ჩვენს ქსელში არის AstraZeneca-ის. ვიმეორებ, ყველა აიცრება, ვისაც აქვს 10-დან 12 კვირის განმავლობაში ჰქონდა დაჯავშნილი და ელოდებოდა აცრას. ვისაც ჰქონდა დაჯავშნილი 4-დან 10 კვირამდე, მათ ვთხოვთ ოდნავ მოთმინებას“, – თქვა მან.
როგორც გამყრელიძემ განმარტა, ბოლო კვლევებით AstraZeneca-ის ვაქცინით რევაქციანაცია უკეთესია ჩატარდებს 8-დან 12 კვირის შუალედში.
„AstraZeneca-ის ვაქცინა იცით, რომ გახლავთ ვექტორზე დაფუძნებული ვაქცინა, რომელიც კეთდება ორჯერადად. და ის კეთდება ისტრუქციის მიხედვით, 4-დან 12 კვირის შუალედში. ანუ მეორე, რევაქცინაცია შეიძლება ჩატარდეს 4-დან 12 კვირამდე. მაგრამ ბევრი კვლევებით, მათ შორის, ჯანმრთელობის მსოფლიო ორგანიზაციის ბოლო რეკომენდაციით, უკეთესია როდესაც ეს ვაქცინა კეთდება 8-დან 12 კვირის განმავლობაში. ამ დოზებზე, რომლებზეც გახსნილი იყო ჯავშნები 30 ივნისამდე, ჩაწერილი იყო დაახლოებით 5000-მდე ადამიანი და მათ შორის პირველ დოზაზე 1250 ადამიანი და დანარჩენი მეორე დოზაზე“, – განაცხადა მან.
მოქალაქეებმა, რომლებსაც AstraZeneca-ის ვაქცინის მეორე დოზაზე არიან დარეგისტრირებულნი, გუშინ დაავადებათა კონტროლის ეროვნული ცენტრისგან მიიღეს შეტყობინება, რომ ვაქცინის მიწოდების შეფერხების გამო მათი ჯავშანი გადავადებულია.