როდესაც დღეს „ნაციონალური მოძრაობა“ საუბრობს, თითქოს „ქართული ოცნება“ არის ბოროტება, ის „ქართული ოცნება“, რომელმაც სასჯელაღსრულების დაწესებულებებში მსჯავრდებულთა რაოდენობა 25 ათასიდან 9 ათასამდე ჩამოიყვანა, და სიკეთე არის „ნაციონალური მოძრაობა“, რომელმაც მანამდე 10 ათასი მსჯავრდებული 25 ათასამდე მიიყვანა, რა თქმა უნდა, ეს არის ფარისევლობა, – ამის შესახებ შალვა პაპუაშვილმა „ქართული ოცნების“ ოფისში გამართულ ბრიფინგზე განაცხადა. მან მეგის ქარდავას ექსტრადიციაზეც ისაუბრა.
„ჩახედეთ სოციალურ ქსელს, როგორი ნარატივის შემოტანა სურთ: კი მაგრამ, იყო თუ არა ის დამნაშავე?; იქნებ ეს იყო ადამიანი, რომელმაც ცოტა ზედმეტი ძალა გამოიყენა; იქნებ ის ადამიანი, ვინც აწამა მოღალატე და საწამებელი იყო? აი ასეთ თემებზე მსჯელობენ. რა თქმა უნდა, მეგის ქარდავა დანაშაულს არ აღიარებს, იმიტომ რომ დარწმუნებულია, რომ დანაშაული არ ჩაუდენია, ვინაიდან დღემდე ჰგონია (როგორც მის მხარდამჭერ პოლიტიკურ ჯგუფს), რომ ის სისტემა, რომლის ნაწილიც იყო წამება და ადამიანი ღირსების შელახვა, იყო კარგი და სწორი სისტემა“, – აცხადებს პაპუაშვილი.
საქართველოს თავდაცვის სამინისტროს სამხედრო პოლიციის დეპარტამენტის ყოფილი უფროსი მეგის ქარდავა უკრაინაში 11 სექტემბერს დააკავეს, 18 სქტემბერს კი საქართველოში ექსტრადიცია განხორციელდა. საქართველოს პროკურატურა მეგის ქარდავას ექსტრადირებას მის წინააღმდეგ არსებული სისხლის სამართლის 11 საქმეზე ითხოვდა. გარკვეულ საქმეებზე ქარდავა დაუსწრებლად არის მსჯავრდებული, ხოლო დანარჩენი საქმეები არსებითად განიხილება შესაბამის სასამართლოებში.