საქართველოს მესამე პრეზიდენტის, მიხეილ სააკაშვილის ადვოკატის, შალვა ხაჭაპურიძის განცხადებით, კლინიკა ,,ვივამედის” პასუხს სასამართლოში გაასაჩივრებენ.
ადვოკატის თქმით, უცხოელ ექსპერტს, ჯეიმს კობის ,,ვივამედის” კლინიკაში მიხეილ სააკაშვილისთვის სამედიცინო ექსპერტიზის ჩატარებაზე უარი ეთქვა.
„მიხეილ სააკაშვილმა თავისი განცხადებით მიმართა კლინიკა „ვივამედის” დირექტორს და სთხოვა ჩართულიყო ამ საქმეში უცხოელი ექსპერტი. დღეს ჩვენდა გასაკვირად მივიღეთ პასუხი კლინიკის დირექტორისგან, სადაც იგი აღნიშნავს, რომ სააკაშვილს არაფერი განსაკუთრებული არ სჭირს და არ ესაჭიროება მსგავსი ტიპის სამედიცინო დახმარების აღმოჩენა, რაც გაუგონარი ფაქტია. ჩვენ ამ დოკუმენტს არ ვეთანხმებით და გავასაჩივრებთ სასამართლოში, უფრო მეტიც გავასაჯაროებთ თუ რა მკურნალობა უტარდება სააკაშვილს ,,ვივამედის” კლინიკაში, მას არ უტარდება ადეკვატური მკურნალობა”, – აღნიშნა შალვა ხაჭაპურიძემ.
განმარტების წერილში „ვივამედი“ წერს, რომ ექიმ ჯეიმს კობის, პაციენტთან შეყვანა სცილდება მათ კომპეტენციას, ხოლო როდესაც ამ ექიმს მიენიჭება საექიმო საქმიანობის უფლება, „ვივამედისგან“ არანაირი შეზღუდვა არ იქნება. ამავე წერილში კლინიკა „ვივამედი“ განმარტავს, რომ უცხოელი სპეციალისტი არის ტრავმატოლოგ-ორთოპედი და მისი დახმარება ვერ იქნება ამ ეტაპზე ჯეროვანი პატიმარ პაციენტი, სააკაშვილის მიმართ.