„ცხოველთა მონიტორინგის სააგენტოს“ დირექტორის, გიორგი კობიაშვილის განცხადებით, კვლევა ჩატარდება, რათა დადგინდეს, რამდენი ძაღლი გადაადგილდება თბილისის ქუჩებში უმეთვალყურეოდ. ამის შესახებ კობიაშვილმა მედიაჰოლდინგ “კვირას” პრესკლუბში გამართულ პრესკონფერენციაზე განაცხადა.
“თბილისში ძაღლების რაოდენობას რაც შეეხება: სამწუხაროდ, ბოლო კვლევა 2015 წელს ჩატარდა. ჩვენ სამუშაო რეჟიმში ვართ, ერთ-ერთ საერთაშორისო ორგანიზაციასთან შეხვედრებს ვატარებთ, რომელიც ამ კვლევის ჩატარებაში დაგვეხმარება. ვფიქრობ, ზაფხულის ბოლოსთვის ეს რაოდენობაც გვეცოდინება. კვლევა მოიაზრებს არა მარტო რაოდენობის დადგენას, არამედ – პრობლემის შინაარსის გარკვევასაც, მაგალითად: სად გვაქვს ცხელი წერტილები, რა დაავადების მატარებლები არიან ასეთი ცხოველები, რა რაოდენობით ცხოველი გადაადგილდება ქალაქის ქუჩებში უმეთვალყურეოდ. 2015 წლის მონაცემებით, თბილისის მასშტაბით 43 000 ძაღლი გადაადგილდებოდა”, – განაცხადა კობიაშვილმა.
როგორც კობიაშვილმა აღნიშნა, მიუსაფარი ცხოველების გამრავლების ერთ-ერთი ძირითადი წყარო მომიჯნავე მუნიციპალიტეტებიდან ცხოველების შემოსვლაა.
მისივე თქმით, სააგენტოს მიზანი ურბანულ გარემოში ბინადარი ცხოველების პოპულაციების მართვაა, რასაც მსოფლიოში აპრობირებული მეთოდით ახორციელებს.
“სამწუხაროდ, ყოველდღიურად უმეთვალყურეოდ ძალიან დიდი რაოდენობით მიუსაფარი ძაღლი გადაადგილდება. ამის დანახვა ყველას შეუძლია. ჩვენი სააგენტო 24 – საათიან რეჟიმში მუშაობს. ჩვენი ძირითადი მიზანი ურბანულ გარემოში ბინადარი ცხოველების პოპულაციების მართვაა, რასაც მსოფლიოში აპრობირებული მეთოდით ვახორციელებთ, ეს არის ცხოველების სტერილიზაცია- კასტრაცია, გამრავლების უნარის შეზღუდვა. ჩვენი ეკიპაჟი 24 -საათიან რეჟიმში მუშაობს. ქუჩებიდან მუნიციპალურ თავშესაფარში ძაღლები სტერილიზაცია- კასტრაციის მიზნით გადაჰყავს. უკან, ურბანულ გარემოში უმოკლეს ვადაში ვაბრუნებთ. ეს ყველაზე ეფექტიანი მეთოდია, რომელიც ჩვენი გამოგონებული არაა. ეს საერთაშორისო ორგანიზაციების, დასავლელი პარტნიორების მიერაა აღიარებული, სადაც პრობლემა ამ მეთოდებით გადაიჭრა. მიუსაფარი ცხოველების გამრავლების ერთ-ერთი ძირითადი წყარო მომიჯნავე მუნიციპალიტეტებიდან შემოსული ცხოველებია. კანონის, რომლის მიღებაც იგეგმება, ამ კუთხითაცაა მნიშვნელოვანი, რადგან პოპულაციების მართვის ცენტრები სხვა მუნიციპალიტეტებშიც შეიქმნება. რა თქმა უნდა, ქალაქის ქუჩებში აგრესიული ძაღლებიც არიან. ჩვენი სპეციალისტები მისამართზე მიდიან, ძაღლის აგრესიას ადგილზე აფასებენ. აგრესიულობის შემთხვევაში, ცხოველი მუნიციპალურ თავშესაფარში გადაგვყავს, იქ აკვირდებიან, რათა დადგინდეს, რამდენად შეიძლება ამ ცხოველის უკან, ქუჩაში დაბრუნება, რამდენად უსაფრთხო იქნება ის ადამიანებისა და სხვა ცხოველებისთვის.
ჩემი ერთ-ერთი ძირითადი მიზანი მუნიციპალური თავშესაფრის გამტარუნარიანობის გაზრდაა. თავშესაფარი, სადაც ცხოველები მუდმივად იქნებიან გადაყვანილები, ეფექტიანი არ არის. რეალურად, გამოსავალს ვერ ვნახავთ. მნიშვნელოვანია, დავამატოთ როგორც საკარანტინე ვოლიერები, ისე – ღია ვოლიერები, საოპერაციო ოთახები, რათა ყოველდღიურად რაც შეიძლება მეტი ცხოველის გადაყვანა, მათთვის გამრავლების უნარის შეზღუდვა შევძლოთ, შემდეგ კი ასეთი ცხოველები უკან, ქუჩაში დავაბრუნოთ, რადგან სტერილიზებული ცხოველი ნაკლებად აგრესიულია. ასევე, ჩვენი მიზანია, საზოგადოების ცნობიერება იმასთან დაკავშირებით ავამაღლოთ, რომ მეპატრონე თავის ცხოველს მეტი ყურადღებით მოეპყროს. ჩვენი მიზანია, ყველა ცხოველი პატრონიანი იყოს, მიუსაფარი ცხოველი ქუჩაში თავისუფლად არ გადაადგილდებოდეს. ვფიქრობ, რამდენიმეწლიან პერსპექტივაში ამ მიზანს მივაღწევთ”, – განაცხადა კობიაშვილმა.