მე ვარ ადამიანი, რომელმაც თავისი ხელით მოკლა ირმა ყოჩიაშვილის დედა და მის თვალწინ დავაგემოვნე მისი დედობილის გული, – ამის შესახებ ე.წ. კანიბალიზმის საქმეზე ბრალდებულმა ბექა შენგელიამ დღვანდელ სასამართლო პროცესზე განაცხადა.
შენგელიამ აღნიშნა, რომ ბრალდებული ირმა ყოჩიაშვილი მისი ფსიქიკური ტერორის ქვეშ იმყოფებოდა და შესაბამისად, ირმა ყოჩიაშვილს არ ჩაუდენია ის დანაშაული, რომელსაც გამოძიება მას ედავება.
”მე ვთხოვ გამოძიებას აღნუსხოს ის თანხები, რაც გამოვძალე ამ ფსიქიკური ტერორის დროს მარიამ-ირმა ყოჩიაშვილს. 13 000 დოლარს აღემატება ეს თანხა. მარიამი დამოუკიდებლად არ მივიდოდა იმ აზრამდე, რომ დედა მოეკლა. ვთხოვ გამოძიებას, შეაფასოს მარიამის ფსიქიკური მდგომარეობა. მარიამის დედობილის გული მის თვალწინ დავაგემოვნე და ის ამას აღტაცებული სახით უყურებდა. ყოველთვის მომწონდა ადამიანზე მანიპულაციის განხორციელება. მე მარიამისგან შევქმენი ესთეტიური მონსტრი. თამამად შეიძლება ეწოდოს ჩემი მსხვერპლი მარიამ ყოჩიაშვილს და იმ არასრულწლოვან გოგონას”, – განაცხადა ბრალდებულმა ბექა შენგელიამ.
მისივე თქმით, მარიამ ყოჩიაშვილს მან შთააგონა, რომ მისი დავალებების შესრულება იყო თავად მარიამ ყოჩიაშვილის სურვილი.
რაც შეეხება ბრალდებული ყოჩიაშვილისთვის აღკვეთის ღონისძიების შეცვლას და პროკურატურის მიერ დასახელებულ მოტივს, რომ თავისუფლებაზე გასვლის შემთხვევაში ყოჩიაშვილმა შეიძლება ახალი დანაშაული ჩაიდინოს, როგორც ბრალდებულმა ბექა შენგელიამ აღნიშნა, ამის არავითარი საფრთხე არ არსებობს.
”არავითარი საფრთხე მამის მოკვლის არ არსებობს”, – განაცხადა შენგელიამ.
თბილისის საქალაქო სასამართლოში ე.წ. რიტუალური მკვლელობის საქმეზე დაკავებულების წინასასამართლო პროცესი მიმდინარეობს. ირმა ყოჩიაშვილმა დედის მკვლელობა აღიარა, მისი მეგობარი ბექა შენგელია კი აცხადებს, რომ ბრალდებას ნაწილობრივ აღიარებს. მისი თქმით, მკვლელობა რიტუალური ხასიათის არ ყოფილა.
ჯამში, აღნიშნულ საქმეზე სულ 5 ადამიანია დაკავებული. საქმეში ასევე ფიგურირებს კიდევ ერთი არასრულწლოვანი გოგონა, რომელსაც ბრალად განზრახ მკვლელობა დამამძიმებელ გარემოებაში ედება, თუმცა იმის გამო, რომ იგი არასრულწლოვანია, მისი საქმე ცალკე წარმოებად გამოეყო. ასევე ცალკე წარმოებად მიმდინარეობს იმ ორი დაკავებულის საქმის განხილვა, რომელსაც დანაშაულის შეუტყობინებლობას ედავებიან. მათი სასამართლო პროცესიც დღეს არის ჩანიშნული.