იმერეთის კრიმინალური პოლიციის ყოფილ უფროსთან ერთად დაკავებულმა დეტექტივ-გამომძიებელმა ზურაბ ჭელიძემ წარდგენილ ბრალში თავი დამნაშავედ ცნო. აღნიშნულის შესახებ ბრალდებულმა დღევანდელ სასამართლო პროცესზე განაცხადა. ჭელიძემ თავი დამნაშავედ ქრთამის აღებაში ცნო, რასაც მას გამოძიება ედავება. აქამდე ბრალდებული თავს უდანაშაულოდ მიიჩნევდა და წარდგენილ ბრალს არ აღიარებდა.
როგორც ჭელიძის ადვოკატმა ტარიელ კაკაბაძემ პროცესის დასრულების შემდეგ განაცხადა, გამორიცხული არაა დაცვის სტრატეგიიდან გამომდინარე ბრალდებულმა პოზიცია კვლავ შეიცვალოს და დანაშაული კვლავ არ აღიაროს. მისივე თქმით, უფრო დეტალურად საუბარი შეეძლება მას შემდეგ, რაც სახელმწიფო ბრალდება შესავალ სიტყვას იტყვის და გაცხადდება, რა მტკიცებულებებით აპირებს ბრალდება მისი დაცვის ქვეშ მყოფისთვის დანაშაულის დამტკიცებას.
რაც შეეხება პროკურორს, როგორც ელიზბარ გოზალიშვილმა აღნიშნა, ბრალდებულის მხრიდან დღეს პირველად გაჟღერდა ბრალის აღიარება და თუ დაცვის მხრიდან იქნება შესაბამისი შუამდგომლობა, პროკურატურა მზადაა საპროცესო შეთანხმებაზე მოლაპარაკებები დაიწყოს. პროკურორის თქმით, აქამდე არცერთ ბრალდებულთან საპროცესო შეთანხმებაზე საუბარი არ ყოფილა.
კრიმინალური პოლიციის იმერეთის სამხარეო სამმართველოს უფროსი გიორგი კაჭარავა წინასწარი შეთანხმებით დიდი ოდენობით ქრთამის გამოძალვის ბრალდებით 2016 წლის სექტემბერში დააკავებს. შსს-ს ინფორმაციით, სახელმწიფო უსაფრთხოების სამსახურთან ერთად ჩატარებული სპეცოპერაციის შედეგად კაჭარავასთან ერთად დაკავებულია სამმართველოს დეტექტივ- გამომძიებელი ზურაბ ჭელიძე. გამოძიების მტკიცებით, გიორგი კაჭარავამ ნარკოტიკული საშუალების უკანონოდ შეძენა-შენახვის ფაქტზე მოწმის სახით დაბარებულ მოქალაქეს უსაფრთხოებისა და ხელშეუხებლობის გარანტად, ასევე იმავე ბრალდებით დაკავებული მისი ახლობლისათვის საპროცესო შეთანხმების გაფორმების უზრუნველსაყოფად გარკვეული თანხის გადახდა მოსთხოვა.
გიორგი კაჭარავას ბრალად ქრთამის აღება, იარაღის უკანონო შეძენა-შენახვა-ტარება, დიდი ოდებობის ნარკოტიკული ნივთიერების შეძენა-შენახვა და ასევე იარაღის, ასაფეთქბელი მოწყობილობებისა და საბრძოლო მასალის უკანონო შეძენა-შენახვა ედება. კრიმინალური პოლიციის იმერეთის სამხარეო სამმართველოს დეტექტივ-გამომძიებელ ზურაბ ჭელიძეს კი გამოძიება მხოლოდ ქრთამის აღებას ედავება.