შიმშილობის გამო ე.წ. კორტების სპეცოპერაციის საქმეზე მსჯავრდებული ირაკლი ფირცხალავას ჯანმრთელობის მდგომარეობა გაუარესდა, – ამის შესახებ საქმეზე მსჯავრდებული გიორგი ცააძის დამ, ირინა ცააძემ განაცხადა. როგორც ირინა ცააძემ აღნიშნა, მას გიორგი ცააძე დაუკავშირდა და განუცხადა, რომ კრიმინალური პოლიციის უფროსის ყოფილი მოადგილის ირაკლი ფირცხალავას მდგომარეობა გაუარესებულია.
”გუშინ ექიმმა მითხრა, რომ მოშიმშილე ადამიანების კვალობაზე, მათი მდგომარეობა სტაბილურიაო. თუმცა ჩემმა ძმამ დამირეკა და მითხრა, რომ ირაკლი ფირცხალავა ძალიან ცუდად არის, თვითონ კი არაუშავს. გიორგი არაა ცუდად, ირაკლი კი ძალიან ცუდადაა – თვალებში აქვს სისხლჩაქცევები. ითხოვა, რომ სახალხო დამცველის წარმომადგენელმა ფოტოაპარატი წამოიღოს. მე-4 დღე დაიწყო რაც შიმშილობენ. აქამდეც არ ჭამდნენ წესიერად საჭმელს და ალბათ ამანაც იმოქმედა ჯანმრთელობაზე. ასევე მათთან ერთად შიმშილობს კიდევ ერთი ადამიანი კობა თოდუა, რომელსაც დიაბეტი აქვს და მისთვის არ შეიძლება შიმშილობა”, – განაცხადა ირინა ცააძემ.