იუსტიციის უმაღლესი საბჭოს წევრები მოსამართლეების მიმართ შესაძლო ზეწოლის შემთხვევებზე ინფორმაციას არ ფლობდნენ. მათ ასევე, არ იცოდნენ, რომ პროკურატურა ამ საქმეს იძიებდა.
როგორც იუსტიციის უმაღლესი საბჭოს თავმჯდომარე ლევან მურუსიძემ ჟურნალისტებს განუცხადა, მისთვის ამ ფაქტის შესახებ სულ რამდენიმე საათის წინ გახდა ცნობილი.
ლევან მურუსიძეს უჩნდება კითხვები რატომ არ იცოდა ამ საკითხის შესახებ ინფორმაცია
მისი თქმით, იუსტიცის უმაღლესი საბჭოსთვის ინფორმაციის მიწოდების პასუხისმგებლობა მოსამართლეებს ეკისრებოდათ.
“სულ რამდენიმე საათის წინ გავიგე აღნიშნული ფაქტის შესახებ ტელევიზიით. რა თქმა უნდა არ არის სასიამოვნო რომ იუსტიციის უმაღლესი საბჭოს მოსამართლეები ამ ინფორმაციას ტელევიზიით ისმენენ. ადრე უნდა გვცოდნოდა ამის შესახებ. ალბათ თავად მოსამართლეებს უნდა ეთქვათ”,-განაცხადა ლევან მურუსიძემ.
მისი თქმით, იუსტიციის უმაღლესის საბჭოს შეხვედრაზე ისინი იმსჯელებენ მოსამართლეებზე შესაძლო ზეწოლის საქმეზე და ასევე განიხილავენ საკითხს, შეხვდებიან თუ არა იმ მოსამართლეებს, რომლებზეც სავარაუდოდ ზეწოლა ხორციელდებოდა.
“ჩვენ შეხვედრაზე შესაძლოა ვიმსჯელოთ საკითხზე შევხვდებით თუ არა მოსამართლეებს, თუმცა უკვე გამოძიება მიმდინარეობს და ამას დიდი მნიშვნელობა აღარ აქვს. ჩვენთვის ერთადერთი ბერკეტი ის იქნებოდა, რომ მიგვემართა სასამართლოსთვის, თუ გავიგებდით მსგავსი ფაქტის შესახებ, მაგრამ ახლა უკვე გამოძიება მიმდინარეობს…”, – განაცხადა ლევან მურუსიძემ.