სპორტის განვითარება ჩვენთვის განსაკუთრებულად მნიშვნელოვანია, ყოველდღიურად ვითარდება ჩვენი სპორტი, გვაქვს განსაკუთრებული მიღწევები, – ამის შესახებ საქართველოს პრემიერ-მინისტრმა ირაკლი კობახიძემ მარნეულში ახალი საფეხბურთო სტადიონის გახსნის ღონისძიებაზე სიტყვით გამოსვლისას განაცხადა.
როგორც მთავრობის მეთაურმა აღნიშნა, მნიშვნელოვანია როგორც მაღალი მიღწევების სპორტის, ისე მასობრივი სპორტის განვითარება.
„დღეს იხსნება არაჩვეულებრივი სტადიონი, რომელიც აშენდა უეფას სტანდარტების შესაბამისად. ის არის აშენებული როგორც უეფას მეორე კატეგორიის სტადიონი, ყველა შესაბამისი აღჭურვილობა ადგილზეა, ადაპტირებულია შეზღუდული შესაძლებლობების მქონე პირებისთვის და, რაც მთავარია, თვალს უხარია ასეთი ლამაზი სტადიონი. მნიშვნელოვანია როგორც მაღალი მიღწევების სპორტის განვითარება, ასევე მასობრივი სპორტის განვითარება, რადგან სპორტი ნიშნავს უფრო ჯანმრთელ საზოგადოებას, უფრო ჯანმრთელ ახალგაზრდობას, სწორ გზაზე მდგომ ახალგაზრდობას და ამიტომ, ყველაფერი გაკეთდება იმისთვის, რომ მომავალშიც ვიზრუნოთ სპორტის განვითარებაზე. ასეთი ობიექტების გახსნაზე აქტიურად მუშაობს ინფრასტრუქტურის სამინისტრო”, – განაცხადა პრემიერმა.
მთავრობის მეთაურმა მადლობა გადაუხადა ინფრასტრუქტურის სამინისტროს მუნიციპალური განვითარების ფონდს, მინისტრ ირაკლი ქარსელაძეს და კულტურისა და სპორტის მინისტრს თეა წულუკიანს სპორტის განვითარებისთვის გაწეული ძალისხმევისთვის.
“მადლობა ფეხბურთის ფედერაციასა და ფეხბურთის ფედერაციის პრეზიდენტს ლევან კობიაშვილს. მომავალშიც ყველაფერი გაკეთდება იმისთვის, რომ ვიზრუნოთ სპორტზე, კონკრეტულად ფეხბურთზე, რომელიც ჩვენთვის განსაკუთრებულად საამაყო სპორტის სახეობაა. მინდა კიდევ ერთხელ განსაკუთრებულად მოგილოცოთ ბავშვებს, ახალგაზრდებს. დარწმუნებული ვარ, ამ სტადიონზე ბევრი ჩემპიონი გაიზრდება“, – აღნიშნა ირაკლი კობახიძემ.
მარნეულში ახალი საფეხბურთო სტადიონის გახსნის ღონისძიების მონაწილეებს ასევე სიტყვით მიმართეს საქართველოს ვიცე-პრემიერმა, კულტურისა და სპორტის მინისტრმა თეა წულუკიანმა, რეგიონული განვითარებისა და ინფრასტრუქტურის მინისტრმა ირაკლი ქარსელაძემ და ფეხბურთის ფედერაციის პრეზიდენტმა ლევან კობიაშვილმა.
მარნეულში ახალი საფეხბურთო სტადიონის პროექტირება-მშენებლობის სამუშაოები სახელმწიფო ბიუჯეტიდან 8.2 მილიონი ლარით დაფინანსდა. ახალი სტადიონი არა მხოლოდ ადგილობრივ, არამედ საერთაშორისო ტურნირებსაც უმასპინძლებს.
