„ერთიანი ნაციონალური მოძრაობის“, „სტრატეგია აღმაშენებელისა“ და „ევროპული საქართველოს“ ლიდერები მუხათგვერდის ძმათა სასაფლაოზე რუსეთ-საქართველოს ომის დაწყების თარიღის აღსანიშნავად, ისევე, როგორც 2013 წლის შემდეგ, დღეს – 7 აგვისტოს მივიდნენ. ისინი ომის დაწყების თარიღის შეცვლის შესახებ კითხვებს ისევ არ პასუხობენ.
კითხვაზე, რატომ შეცვალეს ომის დაწყების თარიღი და რატომ მიიჩნევენ ამ დღედ 7 აგვისტოს და არა 8 აგვისტოს, „ერთიანი ნაციონალური მოძრაობის“ თავმჯდომარემ, თინა ბოკუჩავამ განაცხადა: „ამ კითხვას განსაკუთრებით დღევანდელ დღეს არ ვპასუხობ“.
„სტრატეგია აღმაშენებელის“ ლიდერი გიორგი ვაშაძე კი შენიშვნაზე, რომ პრეზიდენტ სააკაშვილის 2008 წლის 9 აგვისტოს ბრძანებულებაში საქართველოს ტერიტორიაზე რუსული ძალების შემოჭრის თარიღად 2008 წლის 8 აგვისტო იყო მითითებული, აცხადებს, რომ ბრძანებულებაში არ წერია, ვინ როდის უნდა ავიდეს გმირთა სასაფლაოზე.
„დღევანდელ დღეს მაინც მოეშვით პროპაგანდისტულ ქმედებებს“, – განაცხადა გიორგი ვაშაძემ.
„ევროპული საქართველოს“ წევრი გიგი წერეთელი კი აცხადებს, რომ ამ თემაზე დეტალებში ვერ შევა.
„მე არ მგონია, რომ ეს არის ეხლა მთავარი დეტალი“, – განაცხადა გიგი წერეთელმა.