ჟურნალისტური ეთიკის საბჭომ, საქმეზე დავით ნარმანია გიორგი გაბუნიას წინააღმდეგ, სარეზოლუციო ნაწილი, ქარტიის ვებგვერდზე გამოაქვეყნა.
საბჭოს გადაწყვეტილებით, ტელეკომპანია “რუსთავი 2-ის” გადაცემა “კურიერ PS-ის” წამყვანმა გიორგი გაბუნიამ დაარღვია ქარტიის პირველი (სიზუსტე) და მეშვიდე (დისკრიმინაცია) პრინციპი, ხოლო სადავო სიუჟეტის ავტორმა მაია ლომიძემ მესამე (ფაქტის მიჩქმალვა) პრინციპი.
ტელეკომპანია “რუსთავი 2”-ის წარმომადგენლებს, ჟურნალისტური ეთიკის ქარტიაში, თბილისის მერმა დავით ნარმანიამ უჩივლა. ნარმანია სადავოდ ხდიდა 2017 წლის 12 თებერვალს გადაცემა P.S-ის სიუჟეტს, სადაც საუბარი იყო თბილისში საზოგადოებრივი საპირფარეშოების თემაზე. თბილისის მერის აზრით, მასალა არაზუსტ ფაქტებს შეიცავდა და გარდა პირველი, მეშვიდე და მესამე პრინციპისა, დარღვეული იყო მე-11 (ფაქტის განზრახ დამახინჯება) პრინციპიც, თუმცა საბჭომ მე-11 პრინციპის დარღვევა არ დაადგინა.
საბჭოს ინფორმაციით, საქმის განხილვას ესწრებოდა მხოლოდ განმცხადებლის წარმომადგენელი, მოპასუხე ჟურნალისტები სხდომას არ დასწრებიან და საკუთარი პოზიცია არც წერილობით წარმოუდგენიათ. გადაწყვეტილების სამოტივაციო ნაწილს საბჭი მოგვიანებით გამოაქვეყნებს.
28 მარტს, გადაცემა P.S-ის წამყვანმა გიორგი გაბუნიამ, დავით ნარმანიასთან დაკავშირებით გასული კიდევ ერთი სიუჟეტის გამო ეთერში ბოდიში მოიხადა.
“კვირას, პოსტსკრიპტუმში გავიდა სიუჟეტი, რომელშიც საუბარი იყო სამშენებლო კომპანიებზე, რომლებსაც დავით ნარმანიას ძმა, ირაკლი ნარმანია, უწევს ან უწევდა იურიდიულ მომსახურებას. სიუჟეტი სამი კომპანიის საქმიანობას ეხებოდა, აქედან ორის იურისტი ნამდვილად თბილისის მერის ძმაა… მესამე კომპანიის იურისტს ასევე ირაკლი ნარმანია ჰქვია, ოღონდ აღმოჩნდა, რომ ეს სულ სხვა პირია და მას არანაირი კავშირი არა აქვს დავით ნარმანიასთან. ვაღიარებ, ეს ჩვენი შეცდომა იყო, რომელიც იდენტურმა სახელმა, იდენტურმა პროფესიამ და კომპანიის იდენტურმა საქმიანობამ გამოიწვია”, – თქვა გიორგი გაბუნიამ.