ამერიკელმა პროფესორმა ჯეფრი საქსმა ამერიკელ ჟურნალისტთან ტაკერ კარლსონთან ინტერვიუში განაცხადა, რომ საქართველოში ბოლო კვირებში ხელისუფლების შეცვლის მცდელობაა, რაშიც აშშ-ის ჩარევა ნათელია.
„ჩვენ ვხედავთ ცხელ წერტილებს გარშემო, მაგალითად ავიღოთ საქართველოში, სამხრეთ კავკასიის რეგიონში, არის პატარა ტიპიური რეჟიმის შეცვლის მცდელობა, რომელიც ბოლო კვირებში იქ მიმდინარეობს. ეს არ გამოუვათ, მაგრამ მიზანი იყო ამ რეგიონის დესტაბილიზაცია. ამაში აბსოლუტურად ნათელია აშშ-ის ჩარევა“, – განაცხადა საქსმა.
მან ასევე რუმინეთში 24 ნოემბერს გამართული საპრეზიდენტო არჩევნები გაიხსენა. არჩევნების პირველ ტურში კელინ ჯორჯესკუმ გაიმარჯვა, თუმცა 2 დეკემბერს ქვეყნის საკონსტიტუციო სასამართლომ შედეგები გააუქმა.
„ჩვენ ვხედავთ რუმინეთში კიდევ ერთ უცნაურ ეპიზოდს, როდესაც საპრეზიდენტო არჩევნები მეორე ტურში იყო და წამყვანი კანდიდატი ამბობდა, რომ ჩვენ უნდა დავასრულოთ ომი უკრაინასთან. რუმინეთის უზენაესმა სასამართლომ კი არჩევნები გააუქმა რუსეთის ჩარევის ბრალდებით“, – დასძინა მან.