აშშ-ის კონგრესის წარმომადგენელთა პალატის სპიკერის, მაიკ ჯონსონის თქმით, უკრაინის პრეზიდენტის, ვოლოდიმირ ზელენსკის განცხადება იმის შესახებ, რომ ის წუხს იმაზე, რაც გასულ დღეებში თეთრ სახლში მასა და დონალდ ტრამპს შორის მოხდა, არის ის, რასაც ამერიკული მხარე ელოდა.
როგორც ჯონსონმა აღნიშნა, ის ზელენსკის ამ განცხადებას ტრამპთან ერთად განიხილავდა.
„მე ვესაუბრე პრეზიდენტს სადღაც ორი საათის წინ. როცა ზელენსკიმ გააკეთა განცხადება, მე ვუთხარი: „ბატონო პრეზიდენტო, ეს არის ზუსტად ის, რაც მას უნდა ეთქვა“. მე ვგულისხმობ იმას, რომ მან პრეზიდენტს ფაქტობრივად ბოდიში მოუხადა იმის გამო, რაც რამდენიმე დღის წინ ოვალურ კაბინეტში მოხდა, და ის მოლაპარაკებების მაგიდას უბრუნდება“, – თქვა ჯონსონმა.
წარმომადგენელთა პალატის სპიკერმა აგრეთვე დასძინა, რომ ზელენსკის მხრიდან „ბრძნული გადაწყვეტილება“ იქნება, თუ ის ამერიკის შეთავაზებას იშვიათი წიაღისეულის შესახებ მიიღებს.
„მისი მხრიდან ამ გარიგების მიღება ძალიან ბრძნული იქნება. ეს საუკეთესო სცენარია, რომელსაც ამ კონფლიქტისთვის მშვიდობის მოტანა შეუძლია. და როგორც კი პრეზიდენტი ტრამპი ზელენსკის და პუტინს მოლაპარაკებების მაგიდასთან დასვამს, ჩვენ ამ საკითხს გადავწყვეტთ“, – აღნიშნა ჯონსონმა.
ცნობისთვის, ზელენსკიმ გუშინ გამოაქვეყნა წერილი, სადაც ის საუბრობს, რომ წუხს იმის გამო, რაც 28 თებერვალს მასა და ტრამპს შორის ოვალურ კაბინეტში მოხდა. მისი თქმით, ყველაფრის სწორად გაკეთების დრო დადგა. ზელენსკიმ აგრეთვე განაცხადა მზაობა ხელი მოაწეროს იშვიათი წიაღისეულის შესახებ შეთანხმებას ნებისმიერ დროსა და ფორმატში.