ოსკაროსანი რეჟისორი სემ მენდესი ლეგენდარულ პოპ და როკ-ენ-როლ ჯგუფზე The Beatles-ზე ოთხი ფილმის გადაღებას გეგმავს. ინფორმაციას CNN-ი ავრცელებს.
რეჟისორი ფილმებში ჯგუფის თითოეული წევრის მიერ დანახულ The Beatles-ის ისტორიის გადმოცემას აპირებს.
მენდესის თქმით, ჯონ ლენონის როლს ჰარის დიკინსონი შეასრულებს, პოლ მაკკარტნის – პოლ მესკალი, რინგო სტარის როლს ბარი კეოგანი მოირგებს, ჯორჯ ჰარისონისას კი ჯოზეფ ქუინი.
დიკინსონი ცნობილია ფილმით «Babygirl», მესკალმა კი ცოტა ხნის წინ „გლადიატორ 2“-ში ითამაშა. კეოგანმა „ინიშერინის სულებში“ ითამაშა, ქუინმა კი პოპულარულ სერიალში „უცნაური ამბები“.
მენდესის თქმით, ჯერ კიდევ ძალიან ბევრი რამ არის შესასწავლი, როდესაც საქმე ასეთ ლეგენდარულ ჯგუფს ეხება. ოთხივე ფილმის პრემიერა 2028 წლისთვის არის დაგეგმილი.
„სიმართლე გითხრათ, ჩვენ ძალიან დიდი კინემატოგრაფიული მოვლენა გვჭირდება, რათა ადამიანები სახლებიდან გამოვიყვანოთ“, – განაცხადა მენდესმა.
„ამერიკული სილამაზის“ რეჟისორს ჯგუფის წევრების ცხოვრებაზე და მათ შემოქმედებაზე სრული წვდომა ექნება.