დეკანოზი მამალაძე დუმილს არღვევს

ე.წ. “ციანიდის საქმეზე” ვერსია დღევანდელ ნომერში კულუარულ ინფორმაციას სანდო წყაროზე დაყრდნობით აქვეყნებს.
გთავაზობთ ამონარიდს გამოცემის კონფიდენტის საუბრიდან:
“მოპოვებული მტკიცებულებებით დადასტურდა, რომ საქმე გვაქვს ანგარებით, თანამდებობრივი მდგომარეობის და მატერიალური სარგებლის შენარჩუნების მოტივით _ განზრახ მკვლელობის მომზადებასთან, რის საფუძველზეც 2017 წლის 26 აპრილს, გიორგი მამალაძეს დაუმძიმდა ბრალდება სსკ-ს 18, 109-ე მუხლის მე-3 ნაწილის “გ” ქვეპუნქტით, რაც გულისხმობს განზრახ მკვლელობის მომზადებას ანგარებით. გამოძიებით დადგინდა, რომ 2015 წლის ნოემბრიდან გიორგი მამალაძე მუშაობდა საქართველოს საპატრიარქოს ქონების მართვის სამსახურის უფროსად. მუშაობისას მას უარყოფითი დამოკიდებულება ჩამოუყალიბდა საქართველოს კათალიკოს-პატრიარქის მდივან-რეფერენტ შორენა თეთრუაშვილთან. 2016 წლის 4 იანვარს გიორგი მამალაძე გათავისუფლებული იქნა საქართველოს საპატრიარქოს ქონების მართვის სამსახურის უფროსის თანამდებობიდან, რაც მან შორენა თეთრუაშვილის დაუკავშირა, თუმცა იმავდროულად დაინიშნა ხსენებული სამსახურის უფროსის მოადგილის და შპს „საქართველოს საპატრიარქოს წმინდა იოაკიმეს და ანას სახელობის სამედიცინო ცენტრის“ გენერალური დირექტორის თანამდებობებზე. მიუხედავად საქართველოს საპატრიარქოს სამსახურებში დაკავებული მაღალი, ხელმძღვანელობითი თანამდებობებისა, გიორგი მამალაძეს მიაჩნდა, რომ აღნიშნული სამსახურებრივი პოზიციები მისი პიროვნული თვისებების შეუსაბამოდ დაბალი იყო. გიორგი მამალაძე კარიერულ წინსვლად განიხილავდა უშუალოდ საქართველოს საპატრიარქოში არსებული მაღალი თანამდებობის დაკავებას, რომელიც მას შესაძლებლობას მისცემდა საპატრიარქოს სტრუქტურაში არსებულ სამოქალაქო თანამდებობებზე დაენიშნა მასთან დაკავშირებული პირები და თანამდებობიდან გამომდინარე საკუთარი ზეგავლენა გაეზარდა. ამასთან, გიორგი მამალაძე კარიერული წინსვლის დამაბრკოლებლად აღიქვამდა კათალიკოს-პატრიარქის მდივან-რეფერენტ შორენა თეთრუაშვილს და მიაჩნდა, რომ ეს უკანასკნელი ცდილობდა მის გათავისუფლებას სამედიცინო ცენტრის გენერალური დირექტორის თანამდებობებიდან.
არსებული მატერიალური და იერარქიული მდგომარეობის შენარჩუნებისა და მომავალში კარიერული წინსვლის უზრუნველსაყოფად, გიორგი მამალაძემ ანგარებით განიზრახა ძლიერმოქმედი მომწამვლელი ნივთიერების გამოყენებით შორენა თეთრუაშვილის მკვლელობა“.
როგორც პროკურატურის განცხადებიდან ირკვევა, „ციანიდის საქმეზე“ 600-მდე საგამოძიებო და საპროცესო მოქმედება ჩატარდა, მათ შორის, 20-მდე ჩხრეკა-ამოღება და 100-მდე დათვალიერება, ასევე დაიკითხა 70-მდე მოწმე, სხვადასხვა პირის ელექტრონული ინფორმაციის მატარებლიდან, საერთო ჯამში, ამოღებული იქნა 500-მდე გბ მოცულობის ინფორმაცია. გარდა ამისა, საქმეზე, თურმე, ბიოლოგიური, ქიმიური, სამედიცინო, ტოქსიკოლოგიური, ჰაბიტოსკოპიური, ფონოსკოპიური, კალიგრაფიული, ბალისტიკური და კომპიუტერული ექსპერტიზებიც ჩატარდა. ერთი სიტყვით, გამომძიებლებმა მუხლჩაუხრელად იმუშავეს და ისეთი მტკიცებულებები მოიპოვეს, რომლითაც დაკავებულ დეკანოზს ბრალი დაუმძიმდა, თუმცა ახლა ჯერი სასამართლოზეა ანუ თუკი სასამართლო დაიჯერებს, რომ პატრიარქის მდივან-რეფერენტი შესაძლოა, მართლაც გამხდარიყო ანგარებითი შურისძიების მსხვერპლი, მაშინ არსებობს ალბათობა, დეკანოზი გისოსებსმიღმა, მინიმუმ, 16, მაქსიმუმ კი 20 წლით აღმოჩნდეს.
დავუშვათ, ყველაფერი მართლაც ისეა, როგორც პროკურატურა გვეუბნება, მაგრამ საინტერესოა, რატომაა შოთაძის უწყების მიერ გავრცელებულ განცხადებაში ნახსენები ფრაზა _ „გამოყოფილი საქმე“ ანუ თუკი გამოძიება დასრულდა, საკითხავია, რაღა საქმე გამოიყო?
„ვერსიის“ წყაროს ვერსიის თანახმად, არსებული მტკიცებულებებით არ დასტურდება, რომ დეკანოზი და მისი თანამზრახველები „მარილზე“ მაღალი იერარქიის სასულიერო პირის „გაშვებას“ გეგმავდნენ, მაგრამ როგორც ჩვენი კონფიდენტი ამბობს, ძაღლის თავი სწორედ აქაა დამარხული.
„შეიძლება, სხვაზე ბევრი ინფორმაცია მაქვს, მაგრამ ღიად ვერ ვილაპარაკებ და მხოლოდ მინიშნებებს გავაკეთებ. ზოგადად, არ მინდა ისე გამიგოთ, თითქოს დეკანოზის წინააღმდეგ გამოვდივარ, არც უდანაშაულობის პრეზუმფციას ვარღვევ, მაგრამ რატომღაც მგონია, რომ ეს ადამიანი ბოლომდე სუფთა არ უნდა იყოს. ამასთან, ისეთი განცდა მეუფლება, რომ ვიღაცებმა დეკანოზი გაწირეს _ ხელები მას შეაწმინდეს, მაგრამ ამის მიუხედავად, არსებობს ალბათობა, რომ ამ დიდ საეკლესიო შეთქმულებაში მონაწილე პირები მაინც გამოაშკარავდნენ, _ ვარაუდობს „ვერსიის“ წყარო, რომელიც მახვილს პროკურატურის მიერ რამდენიმე დღის წინ გავრცელებულ განცხადებაზე სვამს, _ ყურადღება თუ მიაქციეთ, პროკურატურის განცხადებაში პირდაპირ არის ნათქვამი, რომ დეკანოზი გიორგი მამალაძე პატრიარქის მდივანს მას შემდეგ დაუპირისპირდა, რაც ქონების მართვას ჩამოაცილეს. ახლა ვერ გეტყვით, რეალურად ურევია თუ არა პატრიარქის მდივნის ხელი იმაში, რომ დეკანოზი საპატრიარქოს ქონების მართვის სამსახურის უფროსი აღარ ყოფილიყო, მაგრამ პირადად მე, არ გამოვრიცხავ, საგამოძიებო უწყებები სხვადასხვა პირის კორუფციულ ან სხვა სახის ფინანსურ საქმეებს სწავლობდნენ და პროკურატურის განცხადებაშიც ნახსენები „გამოყოფილი საქმე“ სწორედ ამას ეხებოდეს“,
რასაკვირველია, „ვერსია“ კონფიდენტ რესპონდენტს ჩაეკითხა, კორუფციულ სქემებში სასულიერო პირებიც არიან თუ არა გარეულები, მაგრამ კონფიდენტმა დაკონკრეტებისგან თავი შეიკავა და მხოლოდ ის აღნიშნა, რომ არაფერი უნდა გამოვრიცხოთ.
მოკლედ, თუ ოფიციალურ და კულუარულ ინფორმაციებს თავს მოვუყრით და შევაჯამებთ, შესაძლოა ვივარაუდოთ, რომ „ციანიდის საქმე“ საეკლესიო ინტრიგების ერთ-ერთი ეპიზოდია, რომელიც დიდი ალბათობით, შეიძლება, ახალი, უფრო დიდი სკანდალის ერთგვარი გასაღები გახდეს. ზოგადად, იმის თაობაზე, რომ იგივე სასულიერო პირები უკანონო ფინანსურ საქმიანობაში არიან ჩართულები, ხმა სხვადასხვა დროსაც გავრცელებულა. ამასთან, იმის შესახებაც ბევრს მიუნიშნებია, რომ ზოგმა ანაფორა ბიზნესისა და შემოსავლის წყაროდ აქცია. ყველაფერი ეს შესაძლოა, გადაჭარბებულია, მაგრამ სიმართლის დადგენას ისიც ართულებს, რომ კონკორდატით, საერო სამსახურებს საპატრიარქოს შემოწმების უფლება და საშუალება არ აქვთ, თუმცა ახლა სხვა მოცემულობაა ანუ ,,ციანიდის საქმე” შესაძლოა, საბაბად იქნეს გამოყენებული და საპატრიარქოში, რომელიც ყველა გამოკითხვით, ყველაზე რეიტინგული ინსტიტუციაა, ფინანსური მაკონტროლებლები შევიდნენ.