პარლამენტის ვიცე-სპიკერმა, პარტია „ხალხის ძალის“ თავმჯდომარემ სოზარ სუბარმა რამდენიმე ფაქტი დააზუსტა 2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, სულხან მოლაშვილის წამების, არაადამიანური მოპყრობისა და სიცოცხლის უფლების დარღვევის ფაქტების განხილვის დროს, თამაზ მოლაშვილის (სულხან მოლაშვილის მამა) მოსმენისას.
დეპუტატმა გაიხსენა ევროპის საბჭოს საპარლამენტო ასამბლეის დელეგაციის მაშინდელი ხელმძღვანელის, მათიას იორშის ვიზიტი საქართველოში. ნანა კაკაბაძის მოთხოვნით, იორში სულხან მოლაშვილთან პენიტენციურ დაწესებულებაში შევიდა. დეპუტატის თქმით, ევროსაბჭოს საპარლამენტო ასამბლეის ხელმძღვანელმა განცხადება გააკეთა სულხან მოლაშვილის გაუსაძლის პირობებში ყოფნასთან დაკავშირებით.
პარლამენტის ვიცე-სპიკერმა ევროსაბჭოს ადამიანის უფლებათა კომისრის, თომას ჰამარბეგის პენიტენციურში შესვლის ფაქტიც გაიხსნება. დეპუტატმა აღნიშნა, რომ კომისარი გაოგნებული იყო სულხან მოლაშვილისა და დავით მირცხულავას მონაყოლით.
„მადლობა ბატონო თამაზ და ბოდიში, რომ ასეთი მძიმე ამბების გახსენება გიწევთ, მაგრამ საჭიროა, რომ ახალმა თაობამაც იცოდეს რა ხდებოდა. დავაზუსტებ რამდენიმე რამეს.
ბატონი მათიას იორში, რომელიც თქვენ ახსენეთ, ევროპის საბჭოს საპარლამენტო დელეგაციის მაშინდელი ხელმძღვანელი, იყო ჩამოსული საქართველოში. იგი ნანა კაკაბაძის დაჟინებული მოთხოვნით შევიდა სულხან მოლაშვილთან, ქალბატონ ელენე თევდორაძესთან ერთად. გვახსოვს მისი ემოციები. ჰყვებოდა იმ უსასტიკეს პირობებზე და განცხადებაც გააკეთა. საკანი, რომელშიც სულხან მოლაშვილი მოთავსებული იყო არა უბრალოდ უფანჯრო ოთახი, არამედ იყო სარდაფში ნესტით სავსე ოთახი, სადაც ჰაერიც კი არ იყო. რამდენიმე თვე გაატარა ამ ვითარებაში სულხანმა, ადამიანმა, რომელიც იყო ნაწამები. მხოლოდ მას შემდეგ, რაც ადამიანის უფლებათა სასამართლომ მიუთითა საქართველოს, რომ სულხან მოლაშვილი გადაეყვანათ საავადმყოფოში, მოხდა მისი გადაყვანა ციხის რესპუბლიკურ საავადმყოფოში. მოგვიანებით, როცა მე საქართველოს სახალხო დამცველად ამირჩიეს, ევროსაბჭოს ადამიანის უფლებათა კომისარი ბატონი თომას ჰამარბერგი შევიყვანე სულხან მოლაშვილთან და დავით მირცხულავასთან. ისინი უყვებოდნენ მას იმ წამებაზე, რაც მათ გადაიტანეს. უბრალოდ დაუჯერებელი იყო თომას ჰამარბერგისთვის, ყოველ წამს მიტრიალდებოდა ბატონი კომისარი და მეკითხებოდა- ნუთუ ეს მართალია, ეს შეიძლება მოხდესო? მე ვუდასტურებდი, თუმცა ჩემი დასტური არაფერია იმასთან შედარებით, რაც საბოლოოდ ადამიანის უფლებათა ევროპულმა სასამართლომ დაადასტურა – წამების თითოეული ფაქტი, რომელიც განხორციელდა მოლაშვილისა და მირცხულავას მიმართ. ეს ფაქტები იყო აბსოლუტურად სწორად გამოხატული მათ განცხადებებში და ეს იყო ჩადენილი იმ უსასტიკესი რეჟიმის მიერ,“- განაცხადა სოზარ სუბარმა.