პრეზიდენტ დონალდ ტრამპის მიზნები ირანის მიმართ, რეგიონში სამხედრო ძალების მასშტაბური ზრდის ფონზე, „ძალიან ნათელია“, – განაცხადა ვიცე-პრეზიდენტმა ჯეი დი ვენსმა – ქვეყანა არ უნდა ფლობდეს ბირთვულ იარაღს.
„პრეზიდენტი მაქსიმალურად მკაფიო იყო: ირანს არ შეიძლება ჰქონდეს ბირთვული იარაღი. ეს იქნება საბოლოო სამხედრო ამოცანა, თუკი ის ამ გზას აირჩევს“, – განაცხადა ვიცე-პრეზიდენტმა ჯეი დი ვენსმა Fox News-თან ინტერვიუში და დასძინა, რომ ამ მიზნის მისაღწევად ტრამპის „სასურველი გზა“ დიპლომატიაა.
ვენსმა აღნიშნა, რომ ტრამპის სტრატეგიულ მიზნებთან დაკავშირებული ნებისმიერი გაუგებრობა უსაფუძვლოა და ხაზგასმით განაცხადა, რომ „წითელი ხაზი“ მარტივია.
„ვფიქრობ, ამერიკელების უმეტესობას ესმის, რომ მსოფლიოში ყველაზე გიჟურ და საშინელ რეჟიმს ბირთვული იარაღის ფლობის უფლება არ უნდა მისცე. სწორედ ამას აღწევს პრეზიდენტი. სწორედ ეს დაისახა პრეზიდენტმა ჩვენს მიზნად“, – განაცხადა ვენსმა.