აშშ-ის პრეზიდენტ დონალდ ტრამპის უფროსი მრჩევლები ფიქრობენ, რომ უმჯობესი იქნება, ისრაელმა ირანს აშშ-ის მიერ დარტყმების განხორციელებამდე შეუტიოს, – ამის შესახებ „პოლიტიკო“ წყაროებზე დაყრდნობით წერს.
როგორც გამოცემა წერს, ადმინისტრაციის წარმომადგენლები აცხადებენ, რომ ისრაელის დარტყმა ირანს აიძულებს, საპასუხო ზომები მიიღოს. ეს კი შეერთებული შტატების საზოგადოებაში ამერიკული შეტევის მიმართ მხარდაჭერას გაზრდის.
„ეს მეტ მიზეზს მოგვცემს მოქმედებისთვის“, – განუცხადა წყარომ გამოცემას.
„პოლიტიკოს“ წყაროები ასევე აღნიშნავენ, რომ განიხილება შეერთებული შტატებისა და ისრაელის ერთობლივი ოპერაციაც.
„რეჟიმის შეცვლისთვის მასშტაბურ თავდასხმაზე თუ ვსაუბრობთ, ირანი სავარაუდოდ ყველაფრით უპასუხებს. რეგიონში უამრავი აქტივი გვაქვს და თითოეული მათგანი პოტენციური სამიზნეა. ისინი „რკინის გუმბათის“ ქვეშ არ არიან. ამიტომ, ამერიკული მსხვერპლის მაღალი ალბათობაა. ეს კი დიდ პოლიტიკურ რისკს შეიცავს“, – აცხადებს ერთ-ერთი წყარო.