გამოცემა The Telegraph-ის ცნობით, ირანში დაკარგული ამერიკელი პილოტის სამძებრო სამუშაოებთან ერთად ყალიბდება სხვადასხვა ტიპის ვარაუდები იმის შესახებ, თუ რა გავლენას იქონიებს შექმნილი ვითარება კონფლიქტზე.
ცნობისთვის, გუშინ ირანის ჰაერსაწინააღმდეგო სისტემამ ამერიკული გამანადგურებელი F-15 ჩამოაგდო. თვითმფრინავის ორმა პილოტმა კატაპულტირება მოასწრო. ერთი პილოტი ამერიკელებმა გადაარჩინეს და სამშვიდობოს გაიყვანეს, ხოლო მეორე მფრინავის ბედი დღემდე უცნობია.
გამოცემის ცნობით, კონფლიქტი, შესაძლოა რამდენიმე სცენარით განვითარდეს, თუ მეორე პილოტი ირანელების ხელში ჩავარდება.
თუ ირანი მფრინავის კადრებს გაასაჯაროებს, აშშ-ის პრეზიდენტი, დონალდ ტრამპი კონგრესის, ჯარისკაცის ოჯახის წევრების, ვეტერანთა ორგანიზაციების და საზოგადოების მხრიდან ზეწოლის ქვეშ აღმოჩნდება. ისინი მას ოპერაციის გაჩერებას და მფრინავის გათავისუფლების შესახებ მოლაპარაკებების დაწყებას მოსთხოვენ. ირანზე დარტყმების მიყენება პოლიტიკურად შეუძლებელი გახდება, რაც პოტენციურად ცეცხლის შეწყვეტით დასრულდება.
მეორე სცენარის მიხედვით, თეირანი ატყვევებს პილოტს, მაგრამ ამის შესახებ ჯერ არ ამბობს, შესაბამისად მას მოლაპარაკებებზე ზეწოლის ინსტრუმენტად იყენებს.
დატყვევებული პილოტი ირანისთვის, შესაძლოა, უფრო ძვირფასი აღმოჩნდეს, ვიდრე უბრალოდ ცეცხლის შეწყვეტა, წერს გამოცემა.
ერთი დათმობის ნაცვლად ირანმა აშშ-ს, შესაძლოა, ბევრი პირობა წაუყენოს: ცეცხლის შეწყვეტა, ჰორმუზის სრუტის კონტროლი, გემების გასვლაზე მოსაკრებლის შემოღება, აშშ-ის მომავალ ოპერაციებზე შეზღუდვის დაწესება და, შესაძლოა, სანქციების შემსუბუქება.
როგორც The Telegraph-ი აღნიშნავს, ამ შემთხვევაში, ამერიკელი მფრინავი ირანისთვის მოლაპარაკებების საკვანძო რესურსი იქნება. ტრამპს მოუწევს გადაწყვიტოს, რა არის მისთვის პოლიტიკურად უფრო ძვირფასი – დათმობა, თუ მძევალთან ერთად დროში გაწელილი კრიზისი.
უკანასკნელი ვარიანტი მისაღებია ორივე მხარისთვის, წერს გამოცემა. ის ტრამპს შესაძლებლობას მისცემს გავიდეს კონფლიქტიდან და წარმოადგინოს გარიგება, როგორც წარმატება: სამხედროს დაბრუნება, ირანის შესუსტება და შეთანხმების მიღწევა.
ყველაზე ცუდ სცენარად განიხილება პილოტის მკვლელობა მისი დაკავების ან გასათავისუფლებლად ჩატარებული წარუმატებელი ოპერაციის დროს. ამ თვალსაზრისით, ვითარება, შესაძლოა, მკვეთრად გამწვავდეს: ომიდან გამოსვლის ნაცვლად დაიწყება ახალი ესკალაცია სახმელეთო ჯარების შეჭრის ჩათვლით, ასკვნის გამოცემა.