წყალარინების ქსელის პრობლემა მუხიანის დასახლებაში კიდევ ორი – კალაუბნისა და მუხის ქუჩების მცხოვრებლებს მოუგვარდებათ, – ამის შესახებ თბილისის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა.
მისივე თქმით, წყალარინების ქსელის მოწყობა დაგეგმილია ამავე დასახლებაში, გომბორისა და ერთობის ქუჩებზეც.
„სამუშაოების შედეგად, წყალარინების ქსელი, რომელიც აღნიშნულ ქუჩებზე ამ დრომდე არ არსებობდა, 3 600-ზე მეტ გრძივ მეტრზე მოეწყობა. ადგილობრივი ბიუჯეტიდან პროექტისთვის ორ მილიონ ლარზე მეტი დაიხარჯება“, – განაცხადა კახა კალაძემ.
დედაქალაქის მერმა თანამშრომლიბისთვის მადლობა გადაუხადა შესაბამის პროვაიდერ კომპანიებს.
„გლდანის რაიონის გამგეობა მუხიანის აგარაკებზე სამუშაოებს აქტიურად აწარმოებს. აქამდე საგზაო ინფრასტრუქტურა იყო მოშლილი, მიწისქვეშა კომუნიკაციები არ არსებობდა, შესაბამისად მოქალაქეებს საზოგადოებრივი ტრანსპორტიც ვერ ემსახურებოდა. წლების წინ აღნიშნული პროექტის განხორციელება დავიწყეთ. ხდება დაქსელვა – კომუნიკაციებით უზრუნველყოფა. მადლობა პროვაიდერ კომპანიებს თანამშრომლობისთვის“, – აღნიშნა კახა კალაძემ.