„ჰანიველ ცემენტი“, კასპის ცემენტის ქარხანა გადადის განვითარების ახალ ეტაპზე. იწყება 70 მილიონი აშშ დოლარის ღირებულების პროექტის განხორციელება, რომელიც ცემენტის წარმოების სრულიად ახალ, თანამედროვე ტექნოლოგიურ ხაზს დაედება საფუძვლად, – ამის შესახებ საქართველოს პრემიერ-მინისტრმა ირაკლი კობახიძემ, კასპის ქარხანაში ახალი, 70 მილიონი აშშ დოლარის ღირებულების საინვესტიციო პროექტის პრეზენტაციაზე სიტყვით გამოსვლისას განაცხადა.
მთავრობის მეთაურის თქმით, „ჰანიველ ცემენტი“ ქვეყანაში ერთადერთი კომპანიაა, რომელსაც ამ პროდუქციის სრული ციკლით წარმოება შეუძლია.
„მოხარული ვარ, რომ დღეს „ჰანიველ ცემენტი“, კასპის ცემენტის ქარხანა გადადის განვითარების ახალ ეტაპზე. იწყება 70 მილიონი აშშ დოლარის ღირებულების პროექტის განხორციელება, რომელიც ცემენტის წარმოების სრულიად ახალ, თანამედროვე ტექნოლოგიურ ხაზს დაედება საფუძვლად. ეს არის იმ ტრადიციის გაგრძელება, რომელიც 1926 წელს, კასპში პირველი ქარხნის აშენებით დაიწყო. ქართული ცემენტის წარმოების ეს საუკუნოვანი ისტორია ჩვენი ქვეყნის ინდუსტრიული განვითარების განუყოფელი ნაწილია.
„ჰანიველ ცემენტი“ ქვეყანაში ერთადერთი კომპანიაა, რომელსაც ამ პროდუქციის სრული ციკლით წარმოება შეუძლია. ახალი მასშტაბური პროექტი ჩვენს ქვეყანას საწარმოო სიმძლავრის უპრეცედენტო ზრდას მოუტანს. წარმოება წლიურად 400 000 ტონით გაიზრდება და ჯამურად 2 მილიონ ტონას მიაღწევს.
ეს ნიშნავს, რომ საქართველო გახდება ამ თვალსაზრისით სრულიად თვითკმარი – ჩვენ საკუთარი რესურსით, იმპორტზე დამოკიდებულების გარეშე, შეუფერხებლად მოვამარაგებთ უმსხვილეს ინფრასტრუქტურულ და დეველოპერულ მშენებლობებს.
ჩვენი საქმიანობის მთავარი ორიენტირიც სწორედ ესაა – ქვეყნის ეკონომიკური დამოუკიდებლობის განმტკიცება, იმპორტზე დამოკიდებულების თვისებრივად შემცირება და ადგილობრივი ბაზრისთვის უმაღლესი ხარისხის პროდუქციის მიწოდება.
ჩვენთვის, ბუნებრივია, პრიორიტეტულია გარემოზე ზრუნვაც. ამდენად, მისასალმებელია, რომ საწარმო აღიჭურვება უახლესი ეკოლოგიური სტანდარტების შესაბამისად, რაც მინიმუმამდე დაიყვანს გარემოზე ზემოქმედებას და დანერგავს თანამედროვე, მწვანე წარმოების პრინციპებს.
ამ სახელმწიფოებრივი ხედვის მხარდაჭერისთვის და ასეთი მნიშვნელოვანი პროექტის განხორციელებისთვის მადლობას ვუხდი ყველას, ვინც ჩართული იყო საქმეში – ინჟინერ-მშენებლებს, ტექნიკურ პერსონალს და ჩვენს პარტნიორებს: საქართველოს თანაინვესტირების ფონდს, „ჰანიველ პარტნერზს“ და „ჯიაიჯი ჰოლდინგს“. მინდა, ყველას წარმატებები გისურვოთ“, – აღნიშნა პრემიერმა.
ღონისძიებაზე სიტყვით გამოვიდნენ საქართველოს ეკონომიკისა და მდგრადი განვითარების მინისტრი მარიამ ქვრივიშვილი, Hunnewell Partners-ის მმართველი პარტნიორი ირაკლი რუხაძე, „ჰანიველ ცემენტის“ დირექტორი დავით ჯუღაშვილი და თანაინვესტირების ფონდის გენერალური დირექტორი ივანე ხვედელიძე.
ღონისძიების დასრულების შემდეგ საძირკველში სიმბოლური კაფსულა პრემიერ-მინისტრმა, ეკონომიკის მინისტრმა და „ჰანიველ ცემენტის“ დირექტორმა დავით ჯუღაშვილმა ჩააგდეს.
