„ამ წლის 17 მაისი განსაკუთრებულად ემოციურია. ვფიქრობ, უპრეცედენტოდ ხალხმრავალი უნდა იყოს, ვინაიდან ეს დღე დააარსა ჩვენმა უწმინდესმა და უნეტარესმა ილია მეორემ“, – განაცხადა გადაცემაში „დღის ქრონიკა“ მხატვარმა ნიკუშა შენგელაიამ.
შენგელაიას თქმით, დააარსა იმიტომ, რომ ეს დღე ბიბლიაშიც და სახარებაში მოიხსენიება როგორც ერთ-ერთი დიდი ფასეულობა – ოჯახის სიწმინდის და მშობლების პატივისცემის დღე.
„ამიტომ, ვფიქრობ რაც შეიძლება მეტი ოჯახი უნდა გავიდეთ, რათა პირველ რიგში პატივი მივაგოთ ჩვენი უწმინდესისა და უნეტარესის, ილია მეორის ხსოვნას და რომ მისი გზა გრძელდება, ეს უნდა ჩვენ, ხალხმა დავანახოთ, ერთმანეთი დავინახოთ ქრისტიანებმა. მეორე რიგში, ეს იქნება დიდი მხარდაჭერა ჩვენი ახალი პატრიარქის, შიო მესამის აღსაყდრებიდან, რომ იგრძნოს ხალხის მხარდაჭერა. ის მძიმე ჯვარი, რომელიც მას სატარებელი აქვს, როგორც საქართველოს პატრიარქს, შევუმსუბუქოთ ემოციურად და დაინახოს, რომ ერიც მიც გვერდში დგას. არამხოლოდ ბერი და სამღვდელოება, არამედ ერიც.
ერს იმიტომ ვიძახი, რომ ქართველებს გვაქვს კარგი სიტყვა – „ერი და ბერი“. ეს ერთიანდებოდა იმ დროს, როდესაც ქვეყანაში განსაცდელი იყო ხოლმე. მოგეხსენებათ, ჩვენ 1700 წელს აღვნიშნავთ ჩვენი სამოციქულო ეკლესიისა, ავტოკეფალიისა. სამოციქულო იმიტომ, რომ მოციქული ანდრია პირველწოდებული შემოვიდა და ქრისტიანობა შემოიტანა. ამის შემდეგ საქართველო დგას ამ დიდ ფასეულობებზე, რა ფასეულობებსაც დღეს ებრძვიან. რაც გვესმის ჩვენ, თითიდან გამოწოვილი ნარატივები და იდეოლოგიები, აბსოლუტურად უნისონშია ქრისტიანულ ფასეულობებთან. ჩვენი ვალია დავიცვათ და ერთგულება ვაჩვენოთ, ჩვენ დავინახოთ ერთმანეთი და მთელ მსოფლიოს ვაჩვენოთ ერთგულება ჩვენი ქრისტიანობის მიმართ. ამან მოგვიყვანა დღემდე და ჩვენ არ გვაქვს უფლება მომავალ თაობებს არ დავუტოვოთ ეს ფასეულობები“, – აღნიშნა მან.