„არსენალთან“ ჩემპიონთა ლიგის ფინალის წინ პსჟ-ს გულშემატკივრებს დიდი მოლოდინი აქვთ და ხვიჩა კვარაცხელიასი ეიმედებათ, რომელიც სულ უფრო და უფრო პოპულარული ხდება. „პარიზიენმა“ ქართველს ორი სტატია მიუძღვნა.
ვინსენტ მონგაიარი წერს: „კვარაცხელია ერის კერპი და სიამაყეა. ახლა მთელი მსოფლიო იცნობს საქართველოს. არგენტინელებს ჰყავთ მესი, ქართველებს კი – კვარაცხელია. გამაოგნებელი დრიბლინგის მქონე თვალისმომჭრელი გარემარბი სამშობლოში თავისი უნარების გამო გმირადაა მიჩნეული.
დასავლეთ საქართველოში, ქალაქ წალენჯიხაში, სადაც 26 ათასი ადამიანი ცხოვრობს, პატარა სტადიონთან ახლოს, ხუთსართულიანი სახლის ფასადზე მისი გამოსახულებაა (მურალი გერმანელმა მხატვარმა ქეის მაქლეინმა შექმნა).
ადგილობრივები ირწმუნებიან, რომ კვარაცხელიას ქუჩაზე, 7 ნომერში, უზარმაზარი ნამუშევრის გამოსახვა მხოლოდ დამთხვევაა – ეს ბედნიერი ციფრია და ფეხბურთელის გვარის ადამიანი იქ ბევრია.
ერთი რამ დანამდვილებით შეიძლება ითქვას: „კვარა“, რომელიც 30 მაისს „არსენალს“ დაუპირისპირდება, მთელ საქართველოში დიდი სიყვარულით სარგებლობს“.
მატიე კოსტაგუტა იტყობინება, რომ კვარაცხელიას მაისურებზე საფრანეთის დედაქალაქში დიდი მოთხოვნაა: „ის თითქოს მოედანზე გამარჯვების სურვილითაა შეპყრობილი – რატომ გიჟდებიან ფანები კვარაცხელიაზე? ხვიჩა ხიბლავს მათ, მისი პოპულარობა შაბათის შეხვედრამდე სულ უფრო მზარდი ხდება.
ცენტრალურ კიბეზე მანეკენზე „კვარას“ მაისური ერთადერთია, ელისეს მინდვრებზე კლუბის საფირმო მაღაზიაში მეტი არ მოიძიება, რადგან ყველა უკვე გაიყიდა, ხოლო უსმან დემბელეს, დეზირე დუეს და ნუნო მენდეშის ფორმა მრავლად შეგვხდებათ და ხელმისაწვდომია. აქ ქომაგები გუნდის ატრიბუტიკას იძენენ. მარცხენა თავდამსხმელის საყოველთაო აღიარება იმდენად დიდია, რომ მისი მაისური დეფიციტი გახდა“.
