საქართველოს ეროვნული ნაკრების მთავარმა მწვრთნელმა, ვილი სანიოლმა „მიხეილ მესხი არენაზე“ გამართულ პრესკონფერენციაზე რუმინეთთან ფრედ (1:1) დასრულებული ამხანაგური მატჩი შეაფასა.
„გაუმჯობესდა თუ არა თამაში ისრაელთან და ლიეტუვასთან მატჩების შემდეგ? პოზიტივი ნამდვილად დავინახე და, ჩემი აზრით, ნაკრები პროგრესირებს. გუნდი ერთი კვირის განმავლობაში ერთად ემზადებოდა და ეს სწორედ ამის შედეგია. ახალი ფეხბურთელები გამოვცადეთ და მათ კარგი შთაბეჭდილება დატოვეს. ვიმედოვნებ, მომდევნო შეხვედრას უკეთ ჩავატარებთ.
ირაკლი ეგოიანი ჩემთვის უცხო არ არის, ის დიდი ხანია ჩვენი თვალთახედვის არეშია. მასზე, ისევე როგორც ჩაკვეტაძესა და ბევრ სხვა მოთამაშეზე, დასავლური ფეხბურთის გავლენა საკმაოდ დიდია. რაც შეეხება მამაგეიშვილს, მთლიანობაში მისი თამაში მომეწონა. მართალია, ის გარემარბი არ არის, მაგრამ დავალებებს კარგად ასრულებს, დანარჩენი კი თავად მასზეა დამოკიდებული.
ახალწვეული მცველებიდან ვის შეუძლია მაღალი პრესინგით თამაში? ბოლო წლებში ნაკრებისთვის კაშიას მსგავსი მცველის პოვნა ფუფუნება იყო. ამასთან, დაცვის ცენტრში დავკარგეთ ხოჭოლავა, კვირკველია და გველესიანი. დაკვირვებაა საჭირო, რათა გამოვავლინოთ ისეთი მოთამაშეები, რომლებიც მათ შეცვლიან.
ჩაკვეტაძემ პირველ ტაიმში ისე ითამაშა, როგორც ამას მისგან ველოდით. მისი მდგომარეობის შესახებ ჯერ არაფერი ვიცით, სიტუაცია მალე შეფასდება და ზუსტი დიაგნოზიც გვეცოდინება. რაც შეეხება დავითაშვილს, მას ტრავმაც აწუხებს და იმის გამო, რომ ლიგა 1-ში ვერ დაწინაურდა, ფსიქოლოგიურადაც არცთუ ისე კარგ განწყობაზეა“, – აღნიშნა სანიოლმა.
საქართველოს ნაკრები მომდევნო ამხანაგურ მატჩს 5 ივნისს, ბაჰრეინთან, კვლავ თბილისში ჩაატარებს. შეხვედრა 20:00 საათზე დაიწყება და პირდაპირ რეპორტაჟს პირველი არხი შემოგთავაზებთ.