„სტუდფესტი 2026“-ის ფარგლებში გამართულ მარათონში პირველ ადგილზე ეკონომისტი გიორგი შეკრელიძე გავიდა. მასშტაბურ სტუდენტურ ფესტივალში სხვადასხვა პროფესიის ადამიანები ჩაერთნენ. მათ შორის იყვნენ პრეზიდენტი, თბილისის მერი, სპორტის მინისტრი და ოლიმპიური ჩემპიონები.
5-კილომეტრიანმა მარათონმა, სტარტი ვაკის პარკიდან აიღო და ფინიშის ხაზი მონაწილეებმა თავისუფლების მოედანზე გადაკვეთეს.
პროექტი ცხოვრების ჯანსაღი წესის პოპულარიზაციას და მასობრივ სპორტში მოქალაქეთა ჩართვას ემსახურება. სტუდენტურ ფესტივალში 20 ათასზე მეტი სტუდენტი მონაწილეობს. გამარჯვებულის ტიტულს ის უნივერსიტეტი მოიპოვებს, რომლის სტუდენტებიც ყველაზე მეტ ასპარეზობაში გაიმარჯვებენ. დაჯილდოება 21 ივნისს, ფესტივალის გრანდიოზულ საზეიმო დახურვაზე გაიმართება.
„სტუდენტები, სპორტსმენები ერთიანდებიან გარბენისთვის და კიდევ ერთხელ პოპულარიზაციას უწევენ მასობრივ სპორტს, ჯანსაღი ცხოვრების წესის დამკვიდრებას. მინდა მადლობა გადავიხადო ორგანიზატორებს, თბილისის მერიას. მომავალში ვაპირებთ, რომ თითოეულ მუნიციპალიტეტში გავმართოთ ანალოგიური ღონისძიებები“, – განაცხადა სპორტის მინისტრმა შალვა გოგოლაძემ.
„2000-ზე მეტი მონაწილე გვყავდა გარბენის ფარგლებში. ბოლო წერტილშიც ბევრი მონაწილე ჩამოვიდა. პირველ 500 ადამიანს გადაეცა სიმბოლური პრიზები“, – აღნიშნა „სტუდ ფესტის“ ორგანიზატორმა თამარ საგანელიძემ.