ევროკომისიის პრეზიდენტი ურსულა ფონ დერ ლაიენი ევროკავშირის აღმასრულებელი ორგანოს ხელმძღვანელის პოსტზე მესამე ვადით დარჩენას არ აპირებს. ინფორმაციას POLITICO ავრცელებს.
როგორც გამოცემა წერს, აღნიშნულის შესახებ ფონ დერ ლაიენის ადმინისტრაციის უფროსმა კერძო ვახშამზე განაცხადა, ინფორმაციას კი შეხვედრაზე ჩართული მაღალი რანგის ორი ოფიციალური პირი ავრცელებს.
მათი თქმით, 2029 წლის გეგმების საკითხი მაშინ წამოიჭრა, როდესაც ფონ დერ ლაიენის კაბინეტის ხელმძღვანელი ბიორნ ზიბერტი ცდილობდა მაღალი თანამდებობის პირების დარწმუნებას, რომ ევროკომისიის დაგეგმილი სტრუქტურული რეფორმა არ წარმოადგენს ძალაუფლების ცენტრალიზაციის მცდელობას.
სწორედ ამ კონტექსტში ზიბერტმა აღნიშნა, რომ ფონ დერ ლაიენს მესამე ვადით მუშაობის მიმართ ინტერესი არ გააჩნია, რაც, წყაროების ცნობით, გამოიყენეს როგორც არგუმენტი კრიტიკის საპასუხოდ.
კითხვაზე, რამდენად რეალურია ფონ დერ ლაიენის მესამე ხუთწლიანი ვადა, ევროკომისიის პრესსპიკერმა განაცხადა, რომ პრეზიდენტი სრულად კონცენტრირებულია მიმდინარე მანდატზე და ევროპისთვის არსებულ ძირითად გამოწვევებზე, მათ შორის ამ კვირაში დაგეგმილ „დიდი შვიდეულისა“ და ევროპული საბჭოს შეხვედრებზე. მისი თქმით, 2029 წლის საკითხზე მსჯელობისთვის დრო მოგვიანებით დადგება.
ევროკავშირის ხელშეკრულებების მიხედვით, ევროპული საბჭოს პრეზიდენტს ორვადიანი შეზღუდვა აქვს, თუმცა ევროკომისიის პრეზიდენტზე ასეთი შეზღუდვა არ ვრცელდება. ფონ დერ ლაიენი 2029 წლის არჩევნების დროს 70 წლის იქნება.
მისი მხარდამჭერები აცხადებენ, რომ ხელმძღვანელობის ცენტრალიზებულმა მოდელმა ევროკავშირს დაეხმარა მნიშვნელოვანი კრიზისების მართვაში. მათ შორის რუსეთის ომში უკრაინის წინააღმდეგ და აშშ-თან მზარდ სავაჭრო დაძაბულობაში. თუმცა მოწინააღმდეგეები ამ მიდგომას ზედმეტად ცენტრალიზებულ მმართველობად აფასებენ და ფონ დერ ლაიენის მეორე ვადას აკრიტიკებენ.