ირანის უზენაესმა ლიდერმა, მოჯთაბა ხამენეიმ ირანელ მომლაპარაკებლებს აშშ-თან პირდაპირი მოლაპარაკებების გამართვის უფლება დართო, თუმცა ხაზგასმით აღნიშნა, რომ ეს „არ ნიშნავს მტრის შეხედულებების მიღებას“.
ხამენეის ეს განცხადება, რომელიც მის „ტელეგრამის“ არხზე წერილობითი სახით გამოქვეყნდა, მისი პირველი გამოხმაურებაა აშშ-სა და ირანს შორის ურთიერთგაგების მემორანდუმის ხელმოწერაზე.
ირანის უზენაესი ლიდერი, რომელიც ომის პირველ დღეებში მამის რეზიდენციაზე ისრაელის დარტყმის შედეგად დაიჭრა, მას შემდეგ საჯაროდ არავის უნახავს და არც მისი ხმა გაუგიათ.
თავის წერილობით მიმართვაში ხამენეიმ აღნიშნა, რომ იგი წინააღმდეგი იყო აშშ-თან ურთიერთგაგების მემორანდუმის ხელმოწერის, თუმცა ამის უფლება გასცა პრეზიდენტ მასუდ პეზეშკიანისა და ქვეყნის ეროვნული უსაფრთხოების უმაღლესი საბჭოს რეკომენდაციის საფუძველზე.
ირანის უზენაესმა ლიდერმა შეაქო ის თანამდებობის პირები, რომლებიც მემორანდუმზე მოლაპარაკებებში მონაწილეობდნენ და აღნიშნა, რომ მათ ეს „ზრუნვისა და კეთილი ნების გამო“ გააკეთეს. მან განაცხადა, რომ პეზეშკიანმა და შეთანხმების მხარდამჭერმა სხვა ოფიციალურმა პირებმა პირობა დადეს, რომ „თუ ამერიკული მხარე გადაჭარბებულ დათმობებს მოითხოვს, ისინი მათ არ დაემორჩილებიან“.
ხამენეიმ ასევე განაცხადა, რომ პრეზიდენტმა ტრამპმა შეთანხმებას ხელი „სასოწარკვეთის გამო“ მოაწერა.