ბულგარეთი ვეტოს დაადებს რუსეთის წინააღმდეგ ევროკავშირის სანქციების მორიგ პაკეტს, რადგან ამან შესაძლოა უარყოფითი გავლენა იქონიოს ქვეყნის ეკონომიკაზე, გარდა ამისა, მთავრობა არ ეთანხმება რუსი ეპისკოპოსის მიმართ დაწესებულ სანქციებს – განაცხადა პრემიერ-მინისტრმა, რუმენ რადევმა.
ორშაბათს ევროკავშირმა სანქციების სია გააფართოვა და მას დაამატა 34 ფიზიკური და 47 იურიდიული პირი, რომლებიც დაკავშირებული არიან რუსეთის სამხედრო-სამრეწველო კომპლექსთან, ნავთობისა და გაზის ტანკერების „ჩრდილოვან ფლოტთან“ და პოლიტიკურ ჩარევაში მონაწილე სხვა სუბიექტებთან, მათ შორის რუსეთის მართლმადიდებელი ეკლესიის ერთ-ერთ ეპისკოპოსთან.
„ლუკოილის“ ფუნქციონირებასთან დაკავშირებით მნიშვნელოვანი რისკები არსებობს“, – განუცხადა რადევმა ჟურნალისტებს ბრიუსელში, ევროპული საბჭოს სხდომის წინ.
„ჩვენ გვსურს, რომ ის [კომპანია] სიიდან ამოიღონ“, – თქვა რადევმა.
მან ასევე აღნიშნა სოფიას მეტროსთვის სათადარიგო ნაწილებისა და სასუქების მიწოდების შესაძლო შეფერხების საფრთხე.
„ყველა ეს საკითხი ევროკავშირის გადაწყვეტილების მიმღებ ორგანოებში უნდა განიხილონ“, – განაცხადა რადევმა. „რა გზით შეაჩერა ამ დრომდე ამ სანქციებმა ომი? და საერთოდ, როგორ დაეხმარა ეს მშვიდობას?“
რადევის თქმით, ბულგარეთი არ ეთანხმება რუსეთის ეკლესიის მაღალი რანგის სასულიერო პირების მიმართ სანქციების დაწესებას.
„ეს ომი უკვე გასცდა სანგრებს; ის სცილდება ეკონომიკისა და ენერგეტიკის ფარგლებს. ჩვენ ვხედავთ მის გავლენას კულტურასა და სპორტზე, ახლა კი მხოლოდ ისღა დარჩა, რომ რელიგიაც მოიცვას“.
მიუხედავად ამისა, რადევმა აღნიშნა, რომ ბულგარეთი ხელს არ შეუშლის უკრაინასთან დაკავშირებით ევროკავშირის საერთო გადაწყვეტილებებს.
„ჩვენ მხარს დავუჭერთ უკრაინის ევროკავშირში გაწევრიანებასთან დაკავშირებულ მოლაპარაკებების პროცესს“, – განაცხადა მან.