აშშ-ში, კანადასა და მექსიკაში მიმდინარე ფეხბურთის მსოფლიო ჩემპიონატზე ესპანეთის ნაკრები ფინალში გავიდა. ნახევარფინალურ დაპირისპირებაში, რომელიც დალასში გაიმართა, ესპანელებმა საფრანგეთი 2:0 დაამარცხეს.
მატჩის ბედი ესპანელთა სასარგებლოდ მიკელ ოიარსაბალისა და პედრო პოროს გოლებმა გადაწყვიტა. ანგარიში შეხვედრის 22-ე წუთზე გაიხსნა. ლამინ იამალზე განხორციელებული ფოლის გამო დანიშნული თერთმეტმეტრიანი დარტყმა ზუსტად მიკელ ოიარსაბალმა შეასრულა. მატჩის საბოლოო წერტილი კი 58-ე წუთზე პედრო პორომ დასვა.
ესპანეთის ნაკრები ისტორიაში მეორედ გავიდა მსოფლიო ჩემპიონატის ფინალში, 2010 წელს კი მათ ჩემპიონის ტიტული მოიპოვეს. რაც შეეხება საფრანგეთს, მსოფლიოს ორგზის ჩემპიონები (1998, 2018) და წინა მუნდიალის ფინალისტები მესამე ადგილისთვის ბრძოლაში იასპარეზებენ. ფრანგები მეოთხედ ითამაშებენ ბრინჯაოს მედლებისთვის, საიდანაც ორი შემთხვევა (1958, 1986) წარმატებული იყო.
მსოფლიო ჩემპიონატი 19 ივლისს დასრულდება. ფინალისტის ვინაობა მეორე ნახევარფინალში გაირკვევა, სადაც ოთხშაბათს ერთმანეთს ინგლისისა და არგენტინის ნაკრებები დაუპირისპირდებიან.