ძალიან მნიშვნელოვანი იყო პრეზიდენტ ობამას განცხადებაც, რომელმაც თქვა, რომ რუსეთი ევროპისთვის საფრთხეა, – განაცხადა თავდაცვის მინისტრმა თინა ხიდაშელმა გადაცემა 2030-ში.
“ხვალ იქნება კომუნიკე, რომელიც ვარშავის სამიტმა უნდა დაამტკიცოს. თუ შეიძლება, ასე ითქვას, დღევანდელი დღის ჩვენი მთავარი მონაგარი ნატო-საქართველოს კომისიის სხდომაა, სადაც ერთობლივი დეკლარაცია იქნა მიღებული. ნატო-საქართველოს კომისიის სხდომა სამიტის ფარგლებში პირველად ტარდება, რაც იმაზე მეტყველებს, რომ ჩვენ პარტნიორობის სხვა ეტაპზე ვართ გადასული და ჩვენი ურთიერთობები სულ უფრო და უფრო მნიშვნელოვანი ხდება”, – განაცხადა ხიდაშელმა.
მისი თქმით, იანს სტოლტენბერგმა დღეს გაკეთებულ განცხადებაში, ყველა კითხვას ცალსახა პასუხი გასცა.
“დღეს მთელი დღეა, რუსული მედია საუბრობს იმაზე, რომ ნატო-ს კარი მონტენეგროთი იხურება. იანს სტოლტენბერგმა დღეს ყველა კითხვას ცალსახა პასუხი გასცა. მან ისაუბრა იმ აუცილებელ და გარდაუვალ პროცესზე, რომელიც საქართველოს ნატო-ში მიიყვანს. მან ისაუბრა იმაზე, რომ არსებობს პროცესი და ლოგიკური გზა, რომელიც ყველა ქვეყანამ გაიარა და ის, რაც ვარშავაში ვერ მოხდა, შემდეგ სამიტებზე აუცილებლად მოხდება. ძალიან მნიშვნელოვანი იყო პრეზიდენტ ობამას განცხადებაც, რომელმაც თქვა, რომ რუსეთი ევროპისთვის საფრთხეა. ეს მისი მხრიდან ყველაზე უფრო მძიმე და მკაცრი განცხადება იყო, რაც ამ ხნის განმავლობაში მოგვისმენია”, – განაცხადა თავდაცვის მინისტრმა.
როგორც მან აღნიშნა, ქართული დელეგაცია რამდენიმე ძალიან მნიშვნელოვან ღონისძიებაში მონაწილეობს.
“ჩვენ რამდენიმე ღონისძიებაში ვმონაწილეობთ – ეს არის არესემის ფორმატი, ანუ მტკიცე მხარდაჭერის მისია, რომელსაც ავღანეთში ჩვენს პარტნიორებთან ერთად ვახორციელებთ. ეს არის სახელმწიფო მეთაურების დონეზე ფორმატი, რომელიც ხვალ გაიმართება. მეორე – ყველაზე მნიშვნელოვანი, ექსკლუზიურად ჩვენთვის, ნატო-საქართველოს კომისიის სხდომა, რომელიც დღეს გაიმართა. მესამე კი, ეს არის თავდაცვის მინისტერიალის ფორმატი, რომელიც ნატო-სთან თავსებადობის გეგმებთან დაკავშირებით იმართება და, რომელიც პირდაპირ მიმართულია მათ შორის, პარტნიორი ქვეყნების თავდაცვისუნარიანობის ასამაღლებლად”, – განაცხადა ხიდაშელმა.