თრუსოს ხეობიდან გაუჩინარებულ 5 ახალგაზრდას ცხინვალის ე.წ. იზოლატორიდან დღეს გაათავისუფლებენ. როგორც სახელმწიფო უსაფრთხოების სამსახურში აცხადებენ, ე.წ. საზღვრის უკანონო კვეთის ბრალდებით დაკავებულების ე.წ. სასამართლო პროცესი გუშინ დღის მეორე ნახევარში გაიმართა.
უწყების ინფორმაციითვე, დაკავებულების ჯანმრთელობას და სიცოცხლეს საფრთხე არ ემუქრება. გავრცელებული ცნობით, საქართველოს მოქალაქეებს გზა აებნათ და ოკუპირებულ ტერიტორიაზე აღმოჩნდნენ, რა დროსაც საოკუპაციო რეჟიმის წარმომადგენლებმა ისინი დააკავეს.
ოკუპანტების მიერ გატაცებული 62 წლის კაცი კი გუშინ საღამოს გაათავისუფლეს. გიორგი ხარაზიშვილის თქმით, ცხინვალში ის თრუსოს ხეობიდან გაუჩინარებულ მოლაშქრეებს შეხვდა. მისი ინფორმაციით, ახალგაზრდები თავს კარგად გრძნობენ.
გიორგი ხარაზიშვილი საოკუპაციო რეჟიმმა ე.წ. ჯარიმის გადახდის შემდეგ გაათავისუფლა. ის სოფელ ჭვრინისის მიმდებარე ტერიორიაზე მაშინ დააკავეს, როდესაც საქონელს მწყემსავდა. საოკუპაციო ხაზის მიმდებარედ დაკავებულ საქართველოს მოქალაქეს, ე.წ. საზღვრის უკანონო კვეთას ედავებოდნენ.