“ქრონიკული დაავადებების სამკურნალო მედიკამენტების ჩამონათვალი 23-ს ნაცვლად 50-60 გახდება”

ქრონიკული დაავადებების სამკურნალო მედიკამენტების უზრუნველყოფის პროგრამა მიმდინარე წლის შემოდგომიდან არტერიული ჰიპერტენზიის, ნერვულ და ენდოკრინულ სისტემებთან დაკავშირებული დაავადებების სამკურნალო მედიკამენტებით გაფართოვდება, – ამის შესახებ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა დავით სერგეენკომ დღეს გამართულ ბრიფინგზე განაცხადა. მისი თქმით, ქრონიკული დაავადებების სამკურნალო მედიკამენტების ჩამონათვალი გაიზრდება და 23-ს ნაცვლად სულ 50-60 გახდება.
“სექტემბრის ბოლოს ალბათ, გამოვაცხადებთ ახალ შესყიდვას, როდესაც ამ ჩამონათვალს დაემატება კიდევ ახალი, ე.წ კომბინირებული მედიკამენტები და ძალიან დიდი იმედი მაქვს, რომ წლის ბოლომდე ამ ჩამონათვალის კიდევ ერთი გაფართოება მოხდება”,– აღნიშნა დავით სერგეენკომ.
ამასთან, მინისტრის თქმით, მიმდინარე წლის სექტემბერში, დაახლოებით ერთ ან ორ კვირაში პროგრამაში ჩართული სააფთიაქო ქსელების ჩამონათვალი გაიზრდება.
“ეს პროექტი ახლა მხოლოდ ერთი სააფთიაქო ქსელის საშუალებით ხორციელდება – PSP-ს საშუალებით, სექტემბერშივე, ერთ ან მაქსიმუმ ორ კვირაში სხვა ქსელური აფთიაქები ჩაერთვებიან”,- აღნიშნა დავით სერგეენკომ.