ჯანდაცვის კომიტეტის წევრი დიმიტრი ხუნდაძე ქრონიკული დაავადებების სამკურნალო მედიკამენტებით უზრუნველყოფის პროგრამის გაფართოების საკითხს ეხმაურება. მისი თქმით, “ქართული ოცნების” მთავარ პრიორიტეტად მოსახლეობის ჯანმრთელობაზე ზრუნვა რჩება:
“თითოეული მოქალაქე, საჭიროების შემთხვევაში, იღებს სამედიცინო მომსახურებას. ადამიანები, უფულობის გამო, ქუჩაში უკვე დიდი ხანია, აღარ იღუპებიან, მაგრამ, ბოლო პერიოდში, მედიკამენტებზე ფასების მატებამ მნიშვნელოვნად გაზარდა მათი ჯიბიდან დანახარჯები. ეს განსაკუთრებით რთული იყო მოწყვლადი ჯგუფებისთვის: სოციალურად დაუცველთათვის, პენსიონერებისა და შშმ პირებისათვის.
ჯანდაცვის სამინისტრო 3 სექტემბრიდან მედიკამენტებით უზრუნველყოფის პროგრამას კიდევ უფრო აფართოებს და უფრო მეტ ადამიანს შეეხება ეს შეღავათი. ქრონიკული დაავადებების მქონე პენსიონერებსა და შშმ პირებს მედიკამენტებზე მნიშვნელოვანი ფასდაკლება ექნებათ. ეს შეეხება ფარისებრი ჯირკვლის, გულსისხლძარღვთა სისტემის, ფილტვის ქრონიკული დაავადებების და დიაბეტის სამკურნალო მედიკამენტებს და მათ შეუძლიათ, მაქსიმუმ სამი თვის საკმარისი ოდენობის მედიკამენტი შეიძინონ ფასდაკლებით.
მედიკამენტების უზრუნველყოფის პროგრამა ეტაპობრივად, კიდევ უფრო გაფართოვდება. ეს პროგრამა ფაქტობრივად, არის მოსახლეობის თანადგომის პროგრამა და ხელისუფლებისთვის რა უნდა იყოს იმაზე მეტი საზრუნავი, რაც მოსახლეობის ჯანმრთელობაზე ზრუნვაა და ის, რომ დაიცვას ადამიანისათვის ყველაზე ძვირფასი რამ – სიცოცხლე. ჩვენ ამ პოლიტიკას გავაგრძელებთ და სანამ „ქართული ოცნება“ იქნება ხელისუფლებაში, მისი პირველი და უმთავრესი პრიორიტეტი სწორედ მოსახლეობის ჯანმრთელობაზე ზრუნვა იქნება”,- აღნიშნა დიმიტრი ხუნდაძემ.