სტუდენტების და ახალგაზრდების ინტერესი არის ყველაზე მთავარი პრიორიტეტი ჩვენთვის, ისევე როგორც განათლების სექტორის რეფორმა, – ამის შესახებ საქართველოს პრემიერ-მინისტრმა, მამუკა ბახტაძემ “აღმოსავლეთ პარტნიორობის ევროპული სკოლის” გახსნაზე სიტყვით გამოსვლისას განაცხადა.
„დღეს ჩვენს ქვეყანაში მნიშვნელოვანი პროექტი იწყება – „აღმოსავლეთ პარტნიორობის პირველი სკოლა” – ეს არის სიახლე არა მარტო საქართველოსთვის, არამედ მთლიანად რეგიონისთვის. სწორედ საქართველო გახდება პირველი ქვეყანა, რომელშიც ევროკავშირის ფარგლებს გარეთ სკოლა დაფუძნდა. სასიხარულოა, რომ პირველად ეს სწორედ საქართველოში მოხდა. მინდა მივესალმო სტუდენტებს, რომლებიც გვამხნევებენ. სრული პასუხისმგებლობით ვაცხადებ, რომ სტუდენტების და ახალგაზრდების ინტერესი არის ყველაზე მთავარი პრიორიტეტი ჩვენთვის, ისევე როგორც განათლების სექტორის რეფორმა“, – განაცხადა პრემიერმა.
მისივე თქმით, განათლების სექტორის რეფორმა არის ის უმთავრესი პრიორიტეტი, რომელიც საქართველოს მთავრობას დღეს აქვს.
„დღევანდელი პროექტი არის ჩვენი რეფორმის უმნიშვნელოვანესი ნაბიჯი. ჩვენთვის დიდი პატივია, რომ დემოკრატიის განვითარების და სტაბილურობის მიღწევის გზაზე ჩვენ გვაქვს მუდმივი მხარდაჭერა ევროკავშირის მხრიდან და ჩვენი პარტნიორების მხრიდან და „აღმოსავლეთ პარტნიორობა“ ჩვენ ამ დიდ შესაძლებლობას გვთავაზობს“, – განაცხადა ბახტაძემ და იოჰანეს ჰანს აღნიშნული მნიშვნელოვანი პროექტის განხორციელებისთვის მადლობა გადაუხადა.