“ტყვია მულტიმოქმედების შხამია, ის მოქმედებს ცენტრალურ ნერვულ სისტემაზე, სისხლის წარმოქმნაზე, ენდოკრინულ სისტემაზე, რეპროდუქციულ ფუნქციაზე. თითქმის არ რჩება ფუნქცია ორგანიზმში, რაზეც ტყვია გარკვეულწილად არ მოქმედებს, მაგრამ მისი სამიზნე მაინც ცენტრალური ნერვული სისტემა და სისხლია”, – ამის შესახებ ექიმმა-ტოქსიკოლოგმა ინგა ღვინერიამ განაცხადა.
“დღეს ტყვია ძალიან ბევრ ადგილას გამოიყენება და გარემო ტყვიით არის დაბინძურებული. ადამიანის ორგანიზმში შეღწევის ყველა გზა ტყვიის მიმღები და შემწოვია. ტყვია არ არის ესენციალური მიკროელემენტი, რომელიც აუცილებელია ორგანიზმში ბიოქიმიური პროცესების წარმოებისთვის, ეს ზედმეტია ორგანიზმისთვის. თუმცა, ხვდება ორგანიზმში, ხდება მისი დაგროვება და ხანგრძლივი დაგროვებისა და გარკვეული დონის მიღწევის შემდეგ იწყება მთელი რიგი პათოლოგიები”, – განაცხადა ტოქსიკოლოგმა.
მისივე თქმით, ბავშვებზე იმიტომ არის განსაკუთრებული აქცენტი გაკეთებული, რომ ბავშვები თავიანთი ჩამოუყალიბებელი განვითარების გამო, ვერ ახერხებენ ტყვიის გამოდევნას.
ტოქსიკოლოგის თქმით, ტყვია ბევრ საკვებ პროდუქტსა და ალკოჰოლურ სასმელშიც შეიძლება იყოს.
მისივე თქმით, ტყვიის შემცველობა შეიძლება განისაზღვროს სისხლში, მაგრამ ზოგჯერ თმებშიც, კბილებშიც ხდება დაგროვება. ინგა ღვინერიას თქმით, საქართველოში არის ლაბორატორია, რომელიც საზღვრავს თმებში, თუმცა, ჯერჯერობით აქ არ ხდება სისხლში განსაზღვრა და უცხოეთში იგზავნება აღებული სისხლი. ტოქსიკოლოგის თქმით, აუცილებელია იმის კონტროლი, რომ ქვეყანაში ტყვიის მაღალი შემცველობის მქონე პორდუქცია არ შემოვიდეს.