სასიხარულოა, რომ ჩვენი ხელისუფლება ითვალისწინებს მოსახლეობის აზრს და ამაზე ცოცხალი რეაქცია აქვს, – ასე აფასებს მამა ანდრია ჯაღმაიძე საქართველოს პარლამენტის თავმჯდომარის, ირაკლი კობახიძის განცხადებას, რომელიც არ გამორიცხავს, რომ კანაფის კულტივაცია-წარმოებასთან დაკავშირებული კანონპროექტი პარლამენტიდან გაიწვიონ.
„ეს ინფორმაცია ორმაგად სასიხარულოა. რასაც ჩვენ საშიშროებად ვხედავდით და ვგულისხმობდით, არიდებული იქნება. მეორე მხრივ, ძალიან სასიხარულოა, რომ ჩვენი ხელისუფლება ითვალისწინებს მოსახლეობის აზრს და ამაზე აქვს ასეთი ცოცხალი რეაქცია. მთელი ამ უკმაყოფილების დიდი შემადგენელი იყო ის, რომ ჩანდა, თითქოს ხალხთან შეუთანხმებლად აპირებდა ხელისუფლება გაეკეთებინა ეს. ეს არის ძალიან კორექტული დამოკიდებულება, რასაც გულისხმობს საღი საზოგადოება და სახელმწიფოს საღი დამოკიდებულება მის ხალხთან. ეს ძალიან კარგია.
შემიძლია ვთქვა, რომ იყო რეპლიკები ეკლესიის მიმართ „გირჩის“ ხელმძღვანელის, ზურაბ ჯაფარიძის მიერ გამოთქმული, – თუკი რაიმე გაგვიგონია ბოლო 10 წლის განმავლობაში ეკლესიის მიმართ თქმული, დისკრედიტაციისკენ მიმართული, ცილისმწამებლური, ყოველგვარ ზღვარს გადასული… ამ ერთმა ადამიანმა მოკრიბა, თავის თავში მოაქცია და კოლექტიური ეკლესიების მლანძღველების სახე შეიძინა ზურაბ ჯაფარიძემ“, – განაცხადა მამა ანდრია ჯაღმაიძემ.